Monday, January 5, 2015

KIO shaning ningnan akyu hpyi hpawng galaw

Hkalup Nawku Htingnu, Laiza

2015 ning shaning ningnan hpe hkap tau la ai lam hte shaning dingsa hta hkamla lu ai akyu ara ntsa chyeju shakawn ai akyu hpyi hpawng hpe Wunpawng Mungdan Shanglawt Hpung (KIO) ginjaw Laiza Muklum na manau wang hta January praw 3 ya shani galaw mat ai lam Laiza Muklum Up Hkang Du Dukaba Lawaw Naw San tsun ai.

“Daihpawt hkying 8 minit 10 kawn hpang ai… hkying 10 mitnit 20 kaw ngut ai. Dai hpawng hta ramma, wunpawng htunghking ka manawt hpung ni mahkawn hkawn ma ai. Anhte nawku hpung shagu pawnghpawm nna lamang ni n lu galaw ai raitim ndai shaning nnan hta yawng pawnghpawm nna akyu hpyi hpawng galaw ai lam re” nga tsun ai.

2014 ning December 25 ya shani Hkrismat n du shi yang shawa masha wu wu di di re lamang ni n galaw na matu hte dai ladaw laman hpyen masa sadi maja na matu KIO kawn sadi jaw ndau shabra da ai majaw KIO uphkang ginra kata na mungshawa ni hte tsin-yam dabang ni hkan lamang ni n galaw ai rai nga ai.

2014 ning laman hkamla lu ai akyu ara ni hpe chye chyu shakawn ai lam, shaning tup tawt lai shut shai ai yu bak mara ni hpe mara raw akyu hpyi ai lam hte du na 2015 ning ladaw hta galaw sa wa na magam bungli yi-ngam yawng hta Karai Kasang makawp maga lam woi la na matu lawnglam 3 hpe madung akyu hpyi la ai re nga Dkb. Lawaw Naw San tsun ai.

Jinghpaw Mungdaw shawa masha hte nawku hpung shagu myit hkrum mangrum ai lam lu la ai zawn, du na asuya hte KIO kawn hkawt laga amyu sha laknak hpai hpung ni a mungdan ting gap hkat jahkring bawngban ai lam awngdang wa na re ngu myit mada ai nga matut tsun ai.

Dai akyu hpyi hpawng hta KIO makan dap shagu na seng ai magam gun ni, Laiza buga ginra masha ni hte hpyen yen tsin-yam masha ni yawng 1,500 jan sa du ai nga chye lu ai.

January praw 1 ya shani KIO Ningbaw Kaba Slg. Lanyaw Zawng Hra a 2015 ning shaning ningnan shatsam mungga e 2014 ning hta nanghpam tsi mawan pat jasan lam a matu makam masham hpung shagu, amyu shayi ni, ramma ni, htunghking hte KIO ni pawng nna nanghpam tsi mawan pat jasan lam hpe shakut shaja hkrang shala lu ai majaw shanglawm ai hpu-nau ji nban yawng hpe shagrau sha-a ai lam, du na 2015 ning hta mung nanghpam tsi mawan pat jasan masing yi-ngam hpe matut hkrang shapraw sa wa na matu ga-saw dat  ai.

Tsin-yam masha ni hpe garum madi shadaw la nga ai uhpung uhpawng ni hpe chyeju dum ai lam hte tsin-yam masha garum ntum lam hpe Myen asuya kawn shata 3 hkawt pat shingdang da nna tsin-yam masha ni malu masha hte laga arung arai ni hkyak hkyak ra gadawn nga sai majaw Myen asuya gaw mungmasa laknak langai hku nna jai lang nga ai lam hpe mungdan gadaga chye na hkawn hkrang wa lu hkra yawng jawm shakut na matu shadut da ai.

Mungdan hte amyu sha ni a matu katsi la ai nshung ladaw hta bum lang hkaraw shawnglam ginra ni hkan du hkawm nga ai hpyenla ni hpe mung shagrau sha-a ai lam mungga hta lawm ai. Mungdan ting madang gap hkat jahkring na lam gaw mahtai n re sha mungmasa lam hkrum shaga bawngban na lam hpe galaw sa wa na matu she ahkyak kaba re lam mungga hta shaleng bang da ai.



0 comments:

Post a Comment