Sunday, January 25, 2015

Roirip sat hkrum ai manghkang, mabyin teng sawk shapraw na ra



Jinghpaw Wunpawng Hkalup Hpung Ginjaw (KBC) a laika sasana apnawng saranum yan a matu Htai Mungdan Chiang Mai mare nga Jinghpaw Wunpawng myu sha ni mung yawn hkyen kyu hpyi lamang hpe January (25) ya shani galaw nhtawm mabyin teng sawk shapraw na matu hpyi shawn dat ai.

Saranum yan a manghkang hte seng nna Myen asuya kawn lit la nhtawm mabyin teng sawk shapraw ya na matu kyu hpyi ai lam hte hpawn hpyi shawn dat ai lam rai nga ai.

Chiang Mai na Wunpawng Hkristan Nawku Hpung (WCC) hta nawku hpung shagu kawn Jinghpaw Wunpawng amyu sha ni gaw saranum yan hkrumshan roirip nhtawm zingri sat hkrum ai manghkang ntsa dinghku masha, kanu mungdan e nga nga ai amyu sha ni hte maren yawn hkyen hkrum nga ai masat masa mung re nga WCC hpung komiti ningbaw Slg. Jawa Zau tsun ai.

“Hkumshan roirip zingri sat hkrum ai saranum yan a matu yawn hkyen hkrum nga ai. Dai zawn yawn hkyen hkrum nga ai ten e anhte Htai Mungdan kaw nga ai Wunpawng myu sha ni mung maren mara hkam sha nga ai ngu ai hpe madun ai n-gun awai kyu hpyi hpawng galaw ai lam re” nga shi kawn tsun ai.

Shana daw hkying 2:00 kawn hkying 4:00 du hkra galaw nhtawm Chiang Mai na hkristan nawku hpung shagu lawm ai galung kyu hpyi hpawng hta shawa masha yawng 200 jan sa du ma ai. Dai lamang e Wunpawng Mungdan Shanglawt Hpung (KIO) Tingyang UP Malai-I (hkring sa) Dukaba Gauri Zau Seng kawn n-gun awai shatsam mungga htawn tsun mat ai.

Dai hpang Jinghpaw Wunpawng Amyu Shayi Hpung (KWAT) kaw na mung saranum 2 hkrumshan roirip nhtawm zingri sat hkrum ai sumla ni hte hpawn nga shara hkringdat ma madi madun ai lam hte lawnglam daw shan ni hpe tang madun mat ai. 

Myen asuya dap hte Wunpawng Mungdan Shanglawt Hpyen Dap (KIA) dap ni majan ningnan byin hpang wa ai 2011 ning kawn ya yang na ndai saranum 2 a manghkang hte nga yang Myen hpyen dap kawn amyu shayi ni ntsa hkrum shan hte seng ai roirip ai lam, sat ai hkrum ai lam manghkang yawng (74) rai sai lam KWAT Shingtau Lit Hkam Shy. Seng Zin kawn tsun ai.

“Shan lahkawng gaw KBC kawn apnawng magam gun re. Shan yan gaw amyu shayi hte seng ai. Dai zawn amyu shayi ni law law hkrumshan roirip zingri hkrum ai hpe grau chye wa ai. Ya gade ram law ai ngu gaw yawng chye mat wa sai. Ndai manghkang hpe Myen asuya hpyen dap kawn Dap Dung Up ni jep shagawn taw sai nga tsun ai. Saranum yan a lata na kara singkawng ni hpe shanhte sawk jep na matu la mat ai. Raitim shanhte dai zawn jep joi tim hpyen tara rung kaw sha n ngut ai. Shawng e KWAT kawn madi shadaw da ai manghkang hpe hpyen tara rung kaw sha shake kau ma ai. Mungchying tara rung de sa nna jep joi hkam ai manghkang 2 sha lawm ai. Mungchying tara rung mi nga tim je yang ai lam ni n nga ai”

Saranum yan si ai manghkang mabyin hte seng nna mungdan gadaga jep sagawn hpung hte amyu shayi hpung ni shanglawm ai wanglu wanglang jep sagawn hpung hpaw shabawn nhtawm jep joi na matu Shy. Seng Zin kawn shadut tsun ai.
 
Lahta Sam Mung Muse ginwang Pangsai (Chyu Kuk) ginwang daw Namtau mare Kawnghka kahtawng Jinghpaw Wunpawng Hkalup Hpung nawku jawng wang nta nga let KBC laika sasana apnawng saranum Maran Lu Ra hte Tangbau Hkawn Nan Tsin yan gaw January 19 ya shana yup tung hpuwa ten e hkrumshan roirip zingri ai hta si mat ai rai nga ai.

Shan yan a makoi mayang poi hpe Jinghpaw Mungdaw Myitkyina ginwang AD 2000 gawknu hta galaw nhtawm Jaw Bum Lupding Lupra e January 23 ya shani mungshawa masha mun lam hkan sa let makoi mayang dat ai.

Dai hte maren manghkang byin mat ai Kawnghka kahtawng nawku jawng hta mung hpawt de January 26 ya shani saranum yan n nga mat wa ai yawn hkyen myit dum kyu hpyi hpawng galaw mat na re lam chye lu ai.


0 comments:

Post a Comment