Wednesday, January 14, 2015

Ja Seng Ing si ai manghkang hta Myen hpyendu 50 lang rung dung ten she du


Jinghpaw Mungdaw Hpakan ginwang kawn tsang (9) jawngnum sha si ai manghkang ntsa jep joi ya na matu tang shawn da ai kawn rung shawk hkrum ai wa; Slg. Brang Shawng a rung shawk wa; Myen asuya hpyen dap na Du Up Zani Min Pai gaw 2 ning ting tara rung de lung na matu hprai mat ai kawn January 12 ya shani tara rung de bai lung wa ai nga Slg. Brang Shawng kawn tsun ai.

Rung shawk wa Du Up Zani Min Pai gaw 2013 ning September praw 9 ya shani na rung dung nhtoi hta lung ai hpang Hpakan Tara Rung kawn lang hte lang htet shaga ai raitim sa du wa ai lam n nga ai sha, Laban shani 50 lang ngu na rung dung ten e she sa du ai lam rai nga ai.

“Shi bat Langai Ya shani na rung dung ten kaw sa ai. Anhte maga ra gadawn taw ai lawnglam 6.. shi hpe san jep ai lam ni galaw ai. Shanhte maga na ngangkang ai hpa sakse sakgan n nga ai daw ni hpe anhte maga na tara kasa wa san jep ai” nga Slg. Brang Shawng tsun ai.

January 13 ya shani 51 lang ngu na rung dung ten e jawat hkrum ai Slg. Brang Shawng hte rung shawk sakse ni hpe jep joi mat ai nga shi kawn tsun ai. Du na February praw 2 ya rung dung nhtoi e gaw Slg. Brang Shawng a tara hkam sakse ni hpe kalang bai jep joi mat na re lam shi kawn tsun ai.

2012 ning September 13 ya shani Hpakan ginwang Maw Wan mare Lawk (1) Sut Ngai Yang kahtawng na asak (14) ning tsang (9) jawngnum Shy. Ja Seng Ing hpe gap sat ai manghkang hpe jep joi ya na matu kawa nan Gumsan magam Slg. Ting Tsing hpang tang shawn ai lam hpe n teng n man tang shawn ai lam re nga tsun nhtawm Myen asuya hpyen dap kawn Du Up Zani Min Pai ngu ai wa gaw rung sawk wa tai nhtawm tara nhtang jawat da ai lam rai nga ai.

January 13 ya shani 51 lang ngu na rung dung ten e jawat hkrum ai wa; Slg. Brang Shawng hte rung shawk sakse ni hpe jep joi mat ai nga shi kawn tsun ai.

Kasha si manghkang hpe ahkyak la ya na matu Gumsan magam Slg. Ting Tsing, Tara Masa Ka-up Lam hte Simsa Lam Komishin Ningbaw Jan. Awng San Tsu Chyi hte Myen Mung Amyu Sha Ahkaw Ahkang Komishin ni hpang de kawa rai nga ai Slg. Brang Shawng gaw 2012 ning October praw (1) ya shani tang shawn laika sa dat ai lam rai mali ai.

Shy. Ja Seng Ing hpe Myen asuya dap kawn gap sat kau ai ngu tang shawn dat ai lam hpe Myen asuya hpyen dap ni gaw Wunpawng Mungdan Shanglawt Hpyen Dap (KIA) a tsan tsan kawn jak hte dem kapaw ai bawm a majaw si mat ai lam re nga rung shawk wa kawn tsun shapraw wa ai nga Slg. Bang Shawng kawn tsun ai.

Myen asuya hpyen dap jawat da ai lam ntsa Slg. Brang Shawng gaw tara rung kawn n hkap la ya ai sha dai hpe naw gram lajang ya na matu Slg. Brang Shawng gaw Munghpawm Rap Daw du hkra shawk shawn yu sai raitim shaprai kau ya ai majaw, ya daini du hkra Hpakan Tara Rung e tara htinglet ningwan taw nga ra ai lam re nga Slg. Brang Shawng tsun ai. Tara Rung amying jahkrat ai lam hta hkan nna lahta de tsang hte tsang tang shawn mat na re lam shi kawn matut tsun ai.

“Anhte gaw n tara ai amying jahkrat na kun? Bai lawt kawt wa lu na kun ngu ai lam ntsa matut nna ntsa tsang de lung na re. Anhte hpe roi ai re. Maning shahte tsun ai hta mung ngangkang ai hpa sekse n nga ai. Ya na masa hku nga yang tsa htam shadang 80 ram gaw anhte maga na dang na re” nga Slg. Brang Shawng tsun ai.

Du na February praw 2 ya shani 52 lang ngu na rung dung nhtoi e Slg. Brang Shawng a tara hkam sakse hpe jep joi mat na re lam shi kawn tsun ai.

Slg. Brang Shawng ntsa hpyen dap kawn tara jawat da ai lam hpe dawm kau ya na matu sinpraw dingda asha dan hta shinggyim ahkaw ahkang tawtlai lam ni hpe makawp maga ya nga ai Fortify Rights hpung hte mungdan gadaga shinggyim ahkaw ahkang uhpung uhpawng ni gaw Gumsan magam Slg. Ting Tsing hpang de 2014 ning December 18 ya shani sumbu laika jaw nhtawm hpyi shawn dat sai rai nga ai.



0 comments:

Post a Comment