Lahta Sam mung hta Myen asuya dap hte Wunpawng Mungdan Shanglawt Hpyen Dap (KIA) lapran January 25 ya shani gasat poi laja lana byin ngut ai hpang shana maga de KIA a shawnglam dap langai hpe htingnut kau ya sai lam KIA salang langai tsun ai.
Muse ginwang hte Kuthkai ginwang lapran na KIA Dap Ba (4) Dap Dung (9) npu Dap Kung (2) a shawnglam dap htingnut ya ai lam madung gaw Myen asuya dap Ts.K.Hk Masat (1) npu dap dung 3 hkawt htu lung shamu shamawt wa ai hta hpyen n-gun n bung ai majaw htingnut kau ra mat ai re nga shi kawn tsun ai.
“Mani chyawm hkying 8:00 du hkra majan byin ai. Mani anhte shawnglam dap langai htingnut ya ai nga yang daini gaw gasat hkat ai lam laga n na ai. Law Hkum Dingsa ngu ai dap htingnut kau ya ai. Dai kaw gaw nanghpam tsi mawan pat jasan dabang mung nga ai. Dai ni hpe hkra machyi na tsang, n-gun mung shai ai majaw htingnut kau dat ai” nga Dap Ba (4) salang langai tsun ai.
Muse-Lashu-Nam Hkam mawdaw lam (munghpawm lam maw kaba) a sinna maga na KIA Dap Kung (2) shangwang kata mani hpawt kawn shana hkying 8:00 du hkra Myen asuya dap ni n-gun 200 jan hte htim gasat bang wa ai majaw htingnut kau dat ai re nga tsun ai.
Dai hpang lai wa sai bat mi jan kawn KIA Dap Dung 2, 36, 38 ginra ni hta mung Ts.K.Hk (1) npu dap hpung ni hte shani shagu ngu na majan byin nga ai lam Dap Ba (4) kawn Dukaba Zau La tsun ai.
Ya yang majan byin nga ai shara hta Myen asuya dap hte KIA lapran 2015 ning January shata 12 ya shani shawng ningnan lang majan byin mat ai lam rai nga ai.
0 comments:
Post a Comment