Myen asuya dap hte Wunpawng Mungdan Shanglawt Hpyendap, KIA lapran lahta Sam mung Munggu ginra e masum ya matut manoi gasat gala lam ni byin nga ai majaw hpyen yen (IDP) ni garum ntum ra nga sai re.
Miwa ga jarit hte ni kahtep ai Man Ping mare gaw Munggu hte Hpawng Seng lapran nga ai Jinghpaw Wunpawng amyusha ni hkrai san rai nga ai kahtawng kaji langai re.
Munggu kaw na Myen dap Dapnu (tat-ma) 99 npu, n-gun 80 daram hpyen hpung gaw Man Ping de htu lung wa ai majaw KIA Dapba (6) kata Dapdung (38) hte kahtawng makau May 22, Laban shani kaw nna gasat gala majan byin wa ai re.
Majan byin ai shani jang, htinggaw 18 jan nga ai Man Ping kahtawng masha ni yawng Miwa ga jairit de hprawng yen mat ai re.
Mare masha ni hprawng yen mat ai hpang, mani Wuhpung lahkawng dap lapran aten kadun gap hkat wa nna, dai hpawt matut nna mare kata sinat ngoi ai nsen ni na ai lam, KIA Dapba (6) lit nga salang langai Jinghpaw Shiga Dap KNG de tsun ai.
Laban shana de aten minit 40 jan gasat gala majan byin ai hpang, Myen hpyen ni Man Ping kahtawng de shang wa nna nta wan nat ai lam ni galaw ai re. Myen ni gaw mare de masha n shang shangun ai majaw, dai shana nta kade nat kau ai n chye lu tim tsan ai kaw nna mu lu ai gaw nta masum re lam, lamu ga jarit na myi-chyaw-mu ai ni tsun ai.
May 22 kaw nna jarit sha din ai Miwa hkran hkau na pa hta hprawng shingbyi nga ai Man Ping masha yawng 80 jan rai nna shanhte hta ma chyangai hte asak kung ni mung lawm ai lam, mani shanhte hpe sa du gawan ai Munggu buga salang langai Jinghpaw Shiga Dap KNG de tsun ai.
Mang Hai mare Miwa pyada ni, mani Bat Langai Ya jahpawt daw hta hpyen hprawng masha ni yawng dum nta bai nhtang wa matu sa gawt ai raitim kade n na yang (buga ten pyen 2 jan) sinat bai ngoi wa ai majaw n lu nhtang ai lam sagawn chye lu ai.
Man Ping mare grupyin hta Myen hpyendap hte tinang KIA Dung 38 lapran gasat gala majan ni matut byin na masa nga ai majaw hpyen yen ni aten kadun hta dum nta nhtang wa na n mai byin na re lam, KIA Dapba (6) lit nga salang wa tsun ai re.
Mana de du hkra, kadai kade a garum ntum mung n lu la ai sha Man Ping hpyen yen masha ni gaw hkauna pa e yak yak hkak hkak hte shingbyi nga ai lam Jinghpaw Shiga Dap KNG sagawn chye lu ai.
0 comments:
Post a Comment