Tuesday, May 3, 2016

Myen dap gaw KIA hpun lawk dabang dap 2, matut gasat zing


Myen dap gaw KIA hpun lawk dabang dap2, matut gasat zing

Myen asuya hpyen dap gaw Jinghpaw mungdaw sinpraw maga Wunpawng Mungdan Shanglawt Hpyendap KIA, Miwa ga jarit hpun lawk dabang dap lahkawng hpe lahkawng ya laman, matut gasat zing la sai re.

May praw 1, Laban Ya shani ‘Pa Daw’ makau ‘Chyawk Gyi’ hpun lawk dabang na KIA Dung 1 a dap de Myen Dingdung Daw Daju (M.P.Hk) npu Hk.L.Y (437) dap gaw dai ginra de htu shang wa ai hta KIA maga atsawm n ninghkap ai sha yen kau ya sai.

Dai hpang, dai yen ya ai hpun lawk dabang kaji post de bai Myen hpyen ni dai shana tup sinat kaba hte gap bun ai lam chye lu ai.

Shingrai, May praw 2 hpang shani jahpawt daw, matut manoi wuhpung lahkawng dap lapran laja lana gasat gala majan byin ai hta, KIA maga yawm htum marai 1 hkrat sum ai hte dai post kaji hpe mung bai yen ya ai lam, KIA shawnglam shiga hku chye lu ai.

Dai KIA hpun lawk dabang post 2 gaw Miwa hkran Nongdao hpun lawk dabang kaba hte matut ai lam ntsa nga ai rai nna, ya ten dai post lahkawng e Myen hpyen ni dung nga sai lam chye lu ai.

Ndai mabyin hte seng nna Laiza ginjaw na lit nga KIA Du Kaba Nhpang Naw Bu hpe san yu ai shaloi, “ang gatut gap hkat ai she re. Langai mi gaw dai maga de Myen ni gaw hpa majaw lung shadut ai. Hpa majaw wam hkawm ai ngu chyawm gaw anhte naw sagawn nga ai” nga, Jinghpaw Shiga Dap KNG de tsun ai.

Gasat gala majan byin ai shara gaw Miwa ga jarit makau Manje (snr Mansi) mare sinpraw hte KIA Dung 1 daju Nbapa mare a sinna maga, Manmaw-Manje-Nam Hkam mawdaw lam makau kaw re.

April praw de Amyusha Democracy Ginjaw Pati, NLD asuya n’nan lung wa ai hte, Jinghpaw mungdaw hte lahta Sam mung hta asuya dap hte KIA dap lapran gasat gala majan bai byin hpang wa ai gaw ya ten majan ginra maden wa nga sai re.

KIO/KIA ginjaw Laiza makau KIA Dung 18 a shawnglam post kaji 4 hpe mung asuya dap kaw nna April shata laman gasat zing kau sai re.


0 comments:

Post a Comment