Tuesday, February 10, 2015

KBC saranum 2 a manghkang mabyin teng sawk shapraw ya na, ABCUSA hpyi

Rev. Dr. Roy Medley, Amu Madu, Amerikan Hkalup Hpung Ginjaw

Hkum shan roirip nhtawm zingri sat hkrum ai Jinghpaw Wunpawng Hkalup Hpung Ginjaw (KBC) Laika Hpaji Sasana Apnawng Saranum (2) a manghkang, tengman ai lam sawk shapraw ya na matu Myen Mung kaw du taw nga ai Amerikan Hkalup Hpung Ginjaw (ABCUSA) a Ninggawn Amu Madu Rev. Dr. Roy Medley gaw Jinghpaw Mungdaw Hkringmang Daju hte February praw (9) ya shani hkrum ai shaloi hpyi lajin dat ai nga KBC Amu Madu Rev. Dr. Hkalam Samson kawn tsun ai.

Daihpawt hkying 9:00 kawn 11:00 du hkra hkrum shaga ai lam hta roirip nhtawm sat hkrum ai Saranum yan a manghkang tengman ai hku sawk shapraw ya na matu hte, Jinghpaw hpyen yen tsin-yam masha ni hpe garum madi shadaw ai ni hpe wanglu wanglang hkawmsa ahkang jaw na matu hte nawku hpung ni galaw ai nanghpam tsi mawan pat jasan lam hta mung arau lata gindun sa wa na lam ni, hpe hpyi lajin mat ai nga shi tsun ai.

“Dai Hkalup sasana Amerikan hpung ni chyawm dai saranum ya a lam… mara n nga ai ni hpe jamjau n hkrum shangun mayu ai masa ni tsun mat ai. Nanghpam hta mung arau lata gindun let gara hku galaw sa ra ai ngu hpe tsun ai. Ngai mung hkringmang daju hpe dai hku sha tsun ai re. Mabyin teng hpe sang sang lang lang jep shapraw ra ai ngu sha tsun ai re” nga Rev. Dr. Samson tsun ai.

Amerikan Hkalup Ginjaw kawn Ninggawn Amu Madu Rev. Dr. Roy Medley woi awn ai hpung hte KBC Amu Madu Rev. Dr. Hkalam Samson ni gaw Jinghpaw mungdaw asuya hpung kawn Hkringmang Daju Lajawn Ngan Seng hte hpawn Tara Agyi Daju, Ganawn Mazum Lam Mungdaw Amu Madu ni hte hkying hkum 2 hkrum shaga let tang madun mat ai lam re.

“Hkringmang Daju chyawm gaw shanhte mung hkrang galai ladaw hta hkum tsup ai ngu gaw n lu tsun ai… shakut nga ai ngu ai lam ni tsun ai” nga Sara Samson tsun ai.

Rev. Dr. Roy Medley woi awn ai hpung ni gaw February praw (9) ya hta Myitkyina kawn Yangung mare de bai hkawmsa mat na rai malu ai. Hpawtde February 10 ya shani she Slg Jan. Awng San Tsu Chyi hte Munghpawm Simsa Lam Hkrang Shapraw Komiti (UPWC) Ningtau Ningbaw Hkringmang Slg. Awng Min, yan hte Ne Pyi Daw kaw hkrum shaga na re lam Sr. Samson matut tsun ai.

February praw 7 ya shani ABCUSA hpung gaw KBC ningbaw ningla ni, Sara Saranum ni hte hkrum shaga bawngban mat ai hta KBC hpa-awn ni hku nna Jinghpaw Wunpawng Amyu Sha ni ntsa Myen asuya ban hte ban a dip sha hkrum ai lam hte makam masham lam hta mung dip sha hkrum ai lam ni hpe tang madun mat ai nga chye lu ai.

February praw 6 ya shani e Rev. Dr. Roy Medley woi awn ai kasa ni gaw Jinghpaw Mungdaw Myitkyina KBC ginjaw rung de du wa ai hta Wunpawng Htunghking buhpun palawng ni sumraw let amyu sha dawnghkawn, KBC dawnghkawn, Amerikan dawnghkawn ni hte KBC hpung masha marai 1,000 mi jan hkaptau hkalum la ai lam rai nga ai.

Amerikan Hkalup Ginjaw kawn kasa ni gaw Jinghpaw Wunpawng Amyu Sha ni hpe shawng ningnan Hkalup sasana galaw hpang da nhtawm, ya 200 ning jan hta shawng ningnan lang sa du gawan katsan ai lam mung re nga Saram Samson tsun ai.

February praw 4 ya shani hpaw shabawn dat ai KBC Saranum yan a manghkang a matu marai 15 shanglawm ai jep sagawn komiti malawm ni gaw February praw 9 ya shani Lahta Sam Mung Pangsai (Chyu Kuk) ginwang Namtau mare Kawng Hka kahtawng de rawt mat wa sai lam shi kawn matut tsun ai.

KBC kawn dat ai Laika Hpaji Sasana Apnawng Saranum yan gaw shan lahkawng nga ai Kawng Hka mare maga de Myen Asuya Dap ni maden shang wa ai hpang January 19 ya shana hkum shan roirip nna sat hkum mat ai hta pyada ni kawn jep joi ai lam ni galaw nga ai raitim, ya daini du hkra mabyin teng sawk shapraw lu ai lam n nga ai re.


0 comments:

Post a Comment