Mali Yang majan a majaw KIO jawng 5 pat tawn

July 11 ya shani, Myen hpyen jet nbungli lahkawng hte Sumprabum ginwang KIA Dung 7 Mali Yang post hpe sa gap ai shani kaw nna Mali Yang grupyin kahtawng manga na KIO lawu tsang jawng ni pat kau sai re.

Myen hpyen a zingri zingrat lam hkrit ra ai hte lama jakli lam aten galu pat wa yang n-gu malu masha yak wa na tsang ai majaw, jawng ni pat kau ra ai re lam, chye lu ai.

June 24 ya shani, Mali Yang e Myen hpyendap hte KIA Dung 7 lapran majan byin ai hpang, KIA hpe lusha jarik pat ai hku nna Myen gaw Myitkyina-Putau Mali Hka jakli lam hpe June 29 kaw nna pat tawn ai re.

Ya jawng pat kau sai kahtawng ni gaw Mali Hka a sinpraw sinna hkran hta nga ai--- Mali Yang, Lawt Mai Yang, Hpung Ing Yang, Lawt Kawng Mare, Nhtan Zup hte Ja Ra Yang ni re lam, KIA Dapba 1 du salang ni tsun ai.

Ndai kahtawng manga na hpyen yen 2,000 grupyin du nga sai rai nna, shanhte malawng ya ten Mali Hka a sinpraw hkran KIA Dung 7 ginra Ra Ja Yang hte Nhtan Zup de wa chyawm nga sai re. Dai shara lahkawng hta ginsup nta ni gap nga dingyang re lam, chye lu ai.

Raitim Mali Hka a sinna hkran Sumprabum-Putau mawdaw lam makau Hpung Ing Yang kahtawng masha nkau sha Nhtan Zup de du wa ai lam, law malawng gaw Mali Hka n rap shi ai sha yi, nam hkan e hprawng yen nga ai lam, Dapba 1 salang ni tsun ai.

Myen hpyendap gaw KIA hpe Myitkyina-Putau mawdaw lam hte Mali Hka lapran n nga shangun mayu ai masing hte dai ginra na KIA dap ni hpe majan baw gasat nga ai re lam, KIO ginjaw tsun ai re. Dai rai nna, majan matut manoi byin wa na re majaw hpyen yen ni tinang buga ni de aten kadun laman nhtang lu na n re lam, chye lu ai.

Jinghpaw Wunpawng Hkalup Hpung Ginjaw (KBC) gaw Myen kyat sen 70 daram na garum ntum-- n-gu, muga, tsi mawan ni jakli langai hpring hpe Ja Ra Yang hte Nhtan Zup hpyen yen dabang ni de shalai jaw na jin jin rai sai raitim Myen hpyendap Dingdung Daw Daju M.P.Hk ahkang n jaw ai re. Mawdaw lam hku nna ahkang jaw ai raitim ya ten Lanam Ta lam n kaja ai majaw kaga ladat hku na lam tam garum jaw nga ai lam, KBC tsun ai re.

Ndai bat pru daram kaw nna gaw Nhtan Zup e hpyen yen jawng ni hpaw nna laika sharin hpang nga sai lam chye lu ai.

Posted in: