Hpakan lam Loi Seng majan hta Myen maga 3 si, 10 daram hkala

Majang byin ai majaw lam kaw gan hkring nga ai puada ni

Mani, Hpakan lam Mugawng hte Kamai lapran Loi Seng kaw byin ai majan hta Myen hpyen maga 3 si, 10 daram hkala hkrum ai lam ginra buga masha ni hku nna chye lu ai.

Si ai hta mawdaw gawt ai wa 1 hte pyada 1 mung lawm ai lam, buga masha ni tsun ai re.

Pyada ni mungshawa mawdaw kaba 6 hte Hpakan na bawng masha htaw yu wa ai hpe shimlam jaw ai Myen hpyen Hk.L.Y Masat 250 dap hpe KIA Masat 6 Dapdung hpyenla ni Loi Seng snr Chyahkrau mare makau hkauna pa kaw bawm hte hkap kapaw gasat ai kaw nna gap hkat ai lam byin wa ai re.

Bawm ngoi ai hte Myen hpyen ni gaw dai shara hkauna mam hkai nga ai mung masha ni hpe ma ja gap dum bre ai kaw, Loi Seng mare masha shata-6 ma hkum Slg. Jan Dashi Hkawn Ja (snr) Ma Yam si nna Slg. Mangshang Aye Mya hkala hkrum mat ai lam, myi-chyaw-mu ai ni tsun ai.

Hkala hkrum ai ma hpe Kamai tsirung de woi mat wa nna, hpang e Myitkyina de shalai dat sai lam, Kamai mare masha ni tsun ai.

Lai wa sai June 16 ya kaw nna Hpakan lam hte Hpakan lungseng maw kata, Myen hpyen ni hte KIA Masat 6 dapdung lapran, ningdaw kalang bai shani shagu ngu na gasat poi ni byin nga ai re.

Tatmadaw Myen hpyendap gaw KIO/KIA hpe Hpakan kaw nna atsai awai gawt kau na galaw nga ai majaw ya na zawn gasat gala lam bai byin wa ai rai nga re lam, KIO/KIA salang ni tsun ai re.

Posted in: