UPWC-SD Yangung zuphpawng ten, Mali Yang majan gan zim

Myen asuya UPWC hte amyusha rawt malan hpung SD dat kasa ni lapran, July 23 mani kaw nna Yangung e mungdan ting gap hkat jahkring ga sadi NCA, sen htu shangut na lam ntsa zuphpawng hpang ai shani kaw nna, Mali Yang de majan gan zim nga ai re.

Shawng shani e gaw, KIA Dapba 1 npu Dung 7 ni yen ya ai Mali Yang de n-gun wa jat ai, Putau kaw na mawdaw lam hku lung wa ai Myen hpyen hpung hte, Sumpyi Yang hte Wa Dat Ga lapran lahkawng lang gap hkat wa sai lam, Dapba 1 salang ni KNG Jinghpaw Shiga Dap de tsun shateng ai re.

Dai Myen hpyen hpung gaw Myitkyina daju Hk.L.Y 37 hte Ts.K.Hk-3 (Mugawng) npu Hk.M.Y 389 pawng hpawm dap re. Shanhte gaw Putau kawn Lung Sha Yang du hkra mawdaw hte du wa nna, dai hpang lagaw lam matut hkawm ai shaloi, Dung 7 hte gasat poi byin ai re.

Ndai gasat poi hta, Myen dap maga yawm dik 3 hkala hkrum ai kaw Hk.M.Y 389 na tau dung up (du-tat-yin mu) lawm ai lam, KIO/KIA ginjaw Laiza na du salang ni tsun ai.

Myen hpyen ni gaw hpyen man lahkawng--- Myitkyina-Sumprabum lam hte Putau-Sumpyi Yang-Hpung Ing Yang lam--- hku nna, KIA Dapba 1 npu Dung 7 ginra Mali Hka a sinpraw hkran Mali Hkrang Walawng de shang wa ai chyinghka Mali Yang de htu ai re.

Ya ten, dapdung (tat-yin) 17 daram na Myen hpyen ni Sumprabum grup yin nam de shang rawng nga ai lam, Laiza na Myen-KIO Ginrun Manghkang Hparan Jasan Komiti malawm Du Kaba Nhpang Naw Bu KNG Jinghpaw Shiga Dap de tsun ai.

Mani Yangung zuphpawng hta, KIO Ninggawn Amu Madu Dr. Lahkyen La Ja woi ningbaw ai amyu sha rawt malan hpung ni a lahta tsang dat kasa hpung (Senior Delegation, SD) gaw asuya Munghpawm Simsa Lam Hkrang Shapraw Komiti (UPWC) hte hkrum ai shaloi, “ya ten Jinghpaw mungdaw e byin ai majan ni hpe shayawm kau ya na lam, jahkring kau ya na lam ni hte Myen mung kaw byin nga ai gasat gala lam ni yawng hpe shayawm kau ya matu” tang madun wa sai lam, KIO salang ni tsun ai.

Myen gumsan magam Ting Tsing gaw dai ning November praw 8 ra lata poi n du shi yang, NCA sen htu shangut lu hkra shakut na re lam tsun ai ten, hpyendap gaw KIO hpe Sumprabum ginwang hta jet nbungli, hpyen n-gun kaba ni hte majan baw gasat nga ai re.

Dai zawn tang madun ai hpe asuya maga n hkap la yang gaw, gasat gala lam ni matut nga na sha re lam, Du Kaba Naw Bu tsun ai re.

Posted in: