Tuesday, July 14, 2015

Myen hte KIA, lani mi shara mali hta gap hkat


July 13,2015 Myen hte KIA majan byin shara map

Mani, July 13 lani mi laman, Myen asuya dap hte Wunpawng Mungdan Shanglawt Hpyendap (KIA) lapran shara mali hta gap hkat ai lam ni byin wa sai re.

Lahta Sam mung KIA Dapdung 36 ginra hta shamu shamawt hkawm nga ai Myen hpyen Dapnu (Tatma) Masat 99 hpyen hpung hte, shara masum hta aten kadun gap hkat ai lam ni byin sai.

Ndai Myen dap gaw Sak Hkung a sinpraw Kokang ginra kaw nna KIA Dapba 6 Mong Ko ginra de rap wa ai re lam chye lu ai.

Jahpawt hkying 9 jan ten Mung Baw kaw nna Namtau de lung wa ai dapnu 99 hpyen hpung langai hpe Shabuk Kawng Hka mare makau KIA ni bawm hte lahkawng lang hkap kapaw gasat ai kaw nna aten kadun majan byin wa ai lam, buga masha ni Kachinnews de tsun ai.

Ndai majan hta Myen dap maga 3 si, 5 hkala hkrum nna--- si mang ni hpe majan byin ai shara hta alawan lup makoi kau ai lam dai hpe mu ai ni Kachinnews de tsun ai. Bai, hkala hkrum ai ni hpe gaw ni nawn ai Muse tsirung de htaw mat ai lam, matut chye lu ai.

Shabuk Kawng Hka mare hta shawng e Jinghpaw Wunpawng Hkalup Hpung Ginjaw (KBC) laika sasana saranum lahkawng hpe Myen hpyen Hk.M.Y Masat 503 kawn roi rip zingri sat ai manghkang byin wa sai re.

Ya byin ai majan hta mung, Myen hpyen ni gap ai majaw bu hkawm masha Slg. Nhkum Seng Li si nna makau kaw hkai nu hkai nga ai Shabuk Kawng Hka mare masha Zinghtung Kai hte Slg. Hkun Chyin Leng, hkan la gaw Myen ni gap ai 65 mm kapaw hkra la nna hkala hkrum ai lam, buga masha ni tsun ai.

Slg. Jan Zinghtung Kai gaw hkra maga shabyi hta ningma kap mat nna, madu wa Miwa la gaw hkra maga lahput hte lagaw ni hta ningma kap mat ai lam chye lu ai. Shan hpe Kyokoke (Pangsai) tsirung de shawng woi mat wa nna kalang dat Muse tsirung de htawt tawn sai lam, sagawn chye lu ai.

Kyokoke hte Mong Ko lapran jahpawt daw hkying 8 hta Hpai Kawng hta kalang hte, shana nsin sin wa na mahka hkying 5 jan ten Hkalum lai Kawng Gwi Myen hpyendap makau lam hpunggaw hta aten minit 30 daram gap hkat wa sai lam, buga masha ni tsun ai.

Ndai mabyin lahkawng hta mung masha hte uhpung lahkawng maga si hkala nga n nga n chye lu ai.

Jinghpaw mungdaw maga gaw Sumprabum ninghtawn KIA Dung 7 Mali Yang post hta mani du hkra Myen hpyen ni htu shadut ai lam n nga tim, shada laknak kaba hte galai gachyai gap hkat ai lam ni byin ai lam, chye lu ai.

KIA Dapba 1 npu Dung 7 a Mali Yang post hpe July 11 bat Kru Ya shani Myen hpyen jet nbungli lahkawng hte 2 lang sa gap sai re. Dai hpang Laban jahpawt kaw nna lagaw dap ni hte mung gap hkat ai lam ni byin nga ai re.

 

Hpyen hprawng masha n’nan bai pru


Mani majan ai hte Shabuk Kawng Hka mare masha 100 jan gaw Namtau Hkalup Nawku jawng de, gan hprawng shingbyi nga ai lam, nawku hpung sara ni tsun ai re.

Bai Mali Yang maga bat kru ya shani Myen jet nbungli hte laknak kaba ni gap hpang wa ai shani kaw nna Mali Yang mare masha ni yawng Mali Hka a wawra hkran Dung 7 ginra Ja Ra Yang de hprawng shingbyi nga ai lam chye lu ai.


0 comments:

Post a Comment