Putau na Myen hpyen garum 300 jan Mali Yang de htu

Putau kaw nna mawdaw 15 hte Myen hpyen garum n-gun 300 jan gaw Wunpawng Mungdan Shanglawt Hpyendap KIA Dung 7 hte majan byin shara, Mali Yang de lung wa ai gaw, daini Putau-Myitkyina lam Lung Sha Yang lai sai lam, mu ai ni tsun ai.

Dai hpyen garum ni gaw Myitkyina daju Hk.L.Y 37 hte Ts.K.Hk-3 (Mugawng) npu Hk.M.Y 389 dap ni rai nna shanhte gaw Myitkyina kawn Putau de July 20 bat Langai Ya shani du wa ai re lam, Putau buga shiga lawk Kachinnews de tsun ai.

Mani Sumprabum de gaw, Myitkyina kawn n-gun garum 60 daram hpe helicopter masum hte wa sa tawn ai lam, sagawn chye lu ai.

July 15 ya shani KIA Dung 7 ni yen ya ai, Sumprabum a sinpraw maga deng 20 hkawt lagaw lam sa ra ai, Mali Yang post hta, ya ten Myen hpyen n-gun 300 jan dap jahkrat nga sai raitim mare masha ni hprawng shakram kau ai Mali Yang mare de gaw n lu du shi ai lam, N’gumla Dapba 1 du salang ni tsun ai.

July 18 ya shani, mare de shang wa ai Myen hpyen ni hpe Dung 7 ni hkap nut jaw ai hta, bai htingnut mat ai hpang laknak nkau zing la lu ai lam, Dapba 1 salang ni shateng tsun ai re.

Ya na zawn Mali Yang de Myen hpyen n-gun bai wa jat ai majaw matut manoi majan byin na masa rai nna, shanhte gaw KIA Dung 7 daju Mali Hkrang Walawng hpe zing na masing re lam, Dapba 1 salang ni tsun ai re.

Ya ten Mali Yang e du nga chyalu Myen hpyendap ni hta, Hk.L.Y 137, 138, 266, 46, 29, 37 hte M.P.Hk tai lata shaw ai dap ni lawm ai lam, chye lu ai re.

Myen asuya gaw, KIO hpe mungdan ting gap hkat jahkring ga sadi NCA sen htu na shadut nna, maga mi de mung Sumprabum ginwang Mali Yang e hpyen n-gun kaba, jet nbungli ni hte majan baw gasat nga ai re.

Posted in: