Kani nanghpam kaba ai hku dut ginlen nga ai ni hpe lu rim

Hpakan kaw kani dut sha ai hpaw mi langai

Nanghpam tsi mawan wanglu wanglang dut mari hpaga galaw nga ai Jinghpaw Mungdaw Hpakan ginra hta hkrisatan nawku hpung ni hpaw shabawn da ai kani nanghpam pat jasan komiti woi awn nhtawm nanghpam tsi mawan kaba ai hku dut ginlen nga ai ni hpe lu rim ai lam chye lu ai.

Hpakan ginra Maw Wan hta kaba ai hku dut mari hpaga galaw nga ai Mami Awng ngu ai wa hte Mawmau Layang na kaba ai hku dut mari hpaga galaw nga ai uhpung langai hpe October praw 3 ya shani rim kau ai lam re nga Hpakan pat jasan komiti kawn tsun ai.

Lai wa sai September 26 ya shani kawn asuya pyada rai nga ai marai 2; sak 35 ning Lat Gyi. Tan Zin U hte Agyi langai, sak 50 ning Ma Maw ngu ai Hkyin Hte Myit hte Sin Ji Ma ni hpe rim nhtaw shanhte hpe nanghpam tsi mawan sa ya nga ai Nhkum Lu Pa hpe mung sagawn nga dingyang re lam chye lu ai.

Mawmau Layang hte shara 4 hta shabra nga ai kaba dik dut mari hpaga galaw nga ai; Ma Mu ngu ai wa hte hpawn Mawng Wai yan kawn Yama hpyep 590 jan hpe mung lu rim nna nkau Kani hpraw penesalin palin 2 hpe mung lu rim ai nga tsun ai.

Dai ni hpe Hpakan kani nanghpam pat jasan komiti kawn rim ai shaloi Hpakan ginra asuya laksan nanghpam pyada ni hpe mung shaga nna shanhte hte arau sa rim ai lam re nga nawku hpung pat jasan komiti ningbaw Maran Naw Din, KNG Jinghpaw Shiga Dap de tsun ai.

Shanhte shaba nga ai shara ni gaw Sut Nai Yang, Hpakan lupwa kawng sa lam hte Sut Ja Kawng, Mashi Kahtawng ni hta re lam hte dai zawn nanghpam tsi mawan dut mari hpaga galaw nga ai ni hta ladaw 20 ning jan sai lam chye lu ai.

Dai hte maren Myitkyina ginwang Jaw Masat Hkalup Nawku Hpung pat jasan komiti kawn mung October praw 1 ya shani hta nanghpam tsi mawan lu sha ai marai 4 hpe rim ai lam chye lu ai.

Jinghpaw Mundaw kata nanghpam tsi mawan ladu lai hkra chyam bra nga nna tangdu hkra ahkyak la ai lam n nga ai majaw hkrisatan nawku hpung ni woi awn nhtawm kani nanghpam dut mari hpaga galaw ai ni hpe rim nna asuya de ap ya ai lam, lu sha ai ni hpe mung sadi jaw ai lam, dawn jasan ya ai lam ni galaw nga ai lam chye lu ai.

Dai zawn shatang du du kani nanghpam pat jasan masing hpe hkrang shapraw wa ai majaw kani nanghpam manghkang ni yawm magang wa nhtawm lu sha ai ni hpe dawn ya na matu ginra nta hte hkrat ang ai a matu garum ntum ni mung ra gadawn nga ai lam chye lu ai.

Jinghpaw Mungdaw chyam hkra pat jasan masing hpe laja lana galaw sa wa ai hta asuya maga kawn pat shingdang ai lam nga nna nkau ginra hkan san jep ai lam ni nga ai lam ginra buga masha ni tsun ai.

Posted in: SHIGA