Lahta Sammung, Sak Hkung Hka a sinna maga Wunpawng Mungdan Shanglawt Hpyendap (KIA) Dapba 4 ginra masum de RCSS/SSA Sam rawt malan hpung (dingda) ni shang bang nga sai lam, ginra buga masha ni hku nna chye lu ai.
Ya ten, RCSS/SSA ni gaw KIA Dap 36 ginra Mung Baw krung de n-gun 200 jan shang taw nga nna, KIA Dap 38 ginra Mong Ya maga nkau hte KIA Dap 2 ginra Mung Ji (snr Mong Si) maga hpyen hpung langai lung wa ai lam, Muse ginwang buga masha langai KNG Jinghpaw Shiga Dap de tsun ai.
Sammung dingda maga daju ai, Myen mung asuya hte Mungdan Ting Gap Hkat Jahkring Ga Sadi (NCA) sen htu ai, ndai Restoration Council of Shan State/ Shan State Army (RCSS/SSA) hpyen hpung a hpang e Myen asuya hpyen hpung ni mung hkan nang nga ai hpe mu ai lam, ginra buga masha ni tsun ai.
KIO/KIA ginjaw hte Dapba 4 hpe ‘hpa shiga shana, ahkang hpyi ai lam n nga ai sha’ ya na zawn RCSS ni Lahta Sam mung KIA Dapba-4 ginra ni de shang bang wa ai re lam, KIA shiga lawk tsun ai.
November praw 8 ra lata poi ngut ai hpang, Lahta Sammung KIA Dapba-4 hte Balawng Palaung State Liberation Front/ Ta-ang National Liberation Army (PSLF/TNLA) ginra ni de RCSS ni shang wa ai majaw Balawng hte shawng gap hkat nga sai rai nna mani du hkra Nam Hkam ginwang Mung Wwi lam maga shara gashun majan byin nga ai re.
Raitim, KIA hte gaw dai ni Bat Masum Ya shani du hkra hpyen masa manghkang byin ai lam n nga shi ai.
Bai nna, RCSS ni gaw shanhte amyusha shada Sam rawt malan hpung (dingdung) SSPP/SSA ni nga ai ginra ni de gaw n shang ai re.
Lahta Sam mung e RCSS/SSA dap ni mi na nga ai shara gaw N’mau Pa, Nam Hkam hte Man Chyu lapran nga ai Dapba 701 sha re. Dai re majaw KIA hte PSLF/TNLA uhpung lahkawng maden da chyalu ginra de shang bang wa ai ndai sat lawat gaw ‘RCSS a ginra maden ai masing’ re lam hpe KIA Dapba-4 hte PSLF/TNLA ni mu mada tawn ai lam chye lu ai.
“Sam n re ai Jinghpaw (KIA Dapba-4) hte Balawng (TNLA) ni Lahta Sammung hpe madu sha wa sai...SSPP/SSA hpe sha n mai kam sai. Dai re majaw du na Myen asuya n’nan hte ‘Dap Shara Jahkrat’ gabaw bawngban wa ai shaloi, ginra maden la lu hkra yaw shada ai rai na re nga, Lahta Sammung hpyen masa yu maram nga ai Muse buga na Slg. Htoi Awng tsun ai.
KIO/KIA ginjaw Laiza hta RCSS a sat lawat ntsa bawngban jahta ai lam ni nga nna, KIA Dapba-4 gaw RCSS hpe ninghkap gasat ai lam n galaw shi ai sha naw yu maram yu na hpe matsun tawn ai lam KIA shiga lawk tsun ai.
Kachin Sub-state kata lamu ga dap shara jahkrat na lam hte seng nna, hpunau Sam hte Balawng rawt malan hpung ni hte hpyen masa hku n re sha mungmasa hku angwi apyaw bawngban hparan na hpe KIO/KIA ginjaw gaw ra sharawng nga ai lam chye lu ai re.
RCSS gaw Sammung e shi mahtang Ndan Madu Zawn, gara shara de rai rai sa na ‘ahkang n hpyi ra ai, shiga n shana ra ai’ ngu ai masa hpe seng ang ai mare buga kahtawng ni hta shiga shana shabra nga ai lam chye lu ai re.
Dai zawn sha RCSS matut galaw nga yang, KIA Dapba-4 hte bai kade n na yang hpyen masa manghkang byin wa na masa nga ai lam, ginra buga masha ni yu maram nga ai re.
0 comments:
Post a Comment