Asuya hte rawt malan hpung ni lapran simsa lam bawng na dawn nga dingyang

UNFC amu madu Hku U Re

Asuya gaw simsa lam hpe mungmasa hku nna hkrum saga bawngban hparan na matu galaw nga ai raitim ta-tut hta hpang de htingnut shangun ai sat lawat a marang bawngban hpawng ni gaw daini du hkra jahkrup lu ai lam n nga ai lam Amyu Sha Hpyen Masa Mungmasa Daphpawm (UNFC) kawn shawng nnan lang ningnan bai hpaw shabawn da ai kongsi man hkrum zuphpawng hta ndau dat ai rai nga ai.

“Asuya hku nna mungmasa hku hkrum shaga bawngban hparan na matu galaw nga ai ngu tsun nga ai raitim ta-tut hkrang shapraw sa wa ai lam hta maren mara lam, tara rapra lam n nga ai hta sha n ga hpang de htingnut shangun ai sat lawat ni a majaw bawngban hpawng ni dawn mat ai re nga” October 22 ya shani na ndau laika hta shaleng da ai.

UNFC a shawng nnan lang na kongsi zuphpawng hpe October 20 ya kawn 22 ya du hkra Htai Mungdan shara mi hta masum ya tup galaw ngut ai hpang, shanhte hpaw shabawn da ai makan dap magam lit ni hpe masat jahkrat ai lam hte hpawn lamyan 7 hpe mung bawngban dawdan ai lam rai mali ai.

Asuya gaw amyu sha laknak hpai rawt malan hpung ni hte mungmasa manghkang hpe hkrum shaga bawngban ai ladat hte mahtai n tam ai sha, hpyen masa hku madung hparan nga ai majaw daini du hkra hkrum ra ai lam n nga ai lam, amyu sha ni ra gadawn nga ai Federal munghpawm hte maren mara lam n nga ai lam UNFC a Amu Madu Slg. Hku U Re kawn tsun ai.

“Mungdan hpe uphkang nga ai asuya gaw Panglung myit hkum ga sadi hte maren munghpawm ladat hpe gawgap na ngu tsun ai raitim, daini du hkra shanhte tsun nga ai munghpawm ngu ai gaw n jet ai munghpawm le.. anhte ni jawm myit hkrum lai wa sai Federal munghpawm hte n bung mat sai ngu anhte ningdang ai rai nga ai” nga shi kawn tsun ai.

Dai hpang Myen-ma tat-madaw kawn Jinghpaw Mungdaw, Sam Mungdaw, Kayin Mungdaw ni hkan hpyen masa shamu shamawt ai lam dingrun galaw nga nhtawm majan ni byin nga ai lam hte laga amyu sha ni a Mungdaw ni hkan e mung hpyen masa mahkyen maren ni galaw nga ai majaw mungdan kata simsa lam hpe teng sha ra sharawng ai lam nga/n nga UNFC gaw n tsen n tsan byin taw ai nga tsun da ai.

Lai wa sai September shata jahtum daw hte October praw ni hta Dimukaresi Akyu Jaw Kayin Hpyen Dap (DKBA), Sam Mung Hpyen Dap (SSPP/SSA) ni hte asuya dap ni majan byin mat ai zawn, Jinghpaw Mungdaw Hpakan ginra hta mung Wunpawng Mungdan Shanglawt Hpyen Dap (KIA) a dap shara ni hpe yen ya na matu asuya kawn lang hte lang sadi jaw sharim wa ai majaw daini du hkra lahkawng maga chya hkat nga dingyang rai nga ai.

UNFC gaw asuya hte amyu sha laknak hpai rawt malan hpung nkau hte majan byin nga ai lam hpe jahkring na matu hte lawan ladan ahkyak la hkrang shapraw sa wa na matu hpe October 15 ya shani lawnglam 5 hte hpawn ndau laika shale dat sai rai nga ai.

Masum ya hpawng ai zuphpawng hta UNFC e hpaw shabawn da ai sawn dinglik lam hte tarawng tara makan dap, maigan kit hkai makan dap, zinlum lam hte nsen shapraw makan dap, gumhpraw dum makan dap, makawp maga makan dap, zinlum ai lam shiga hte nsen shapraw makan dap, lakawn lanawn lam hte shara bai jahkrat ya ai makan dap ni hte seng ai lam ni hta mung ngang kang ai magam bungli lamyan ni hpe bawngban dawdan ai nga Slg. Hku U Re kawn tsun ai.

Ya yang Myen mungdan hte seng ang ai mungdan gadaga a mabyin masa, mungdan kata na mabyin masa, amyu sha laknak hpai rawt malan uhpung uhpawng ni a mabyin masa hte asuya munghpawm simsa lam hkrang shapraw komiti (UPWC) hte amyu sha laknak hpai rawt malan hpung ni a mungdan ting madang gap hkat jahkring bawngban jahkrup hpung (NCCT) ni a bawngban jahkrup ai mabyin masa malu ni hpe la-kap nna mabyin masa hte htap htuk ai shawng lam jasat jasa ni hpe masat jahkrat da lu sai nga chye lu ai.

2011 ning February shata e amyu sha laknak hpai rawt malan hpung ni a hkrumra hpawng kawn UNFC hpe hpaw hpang dat nna laknak hpai uhpung uhpawng 12 shang lawm hpaw shabawn da ai rai nga ai.

Posted in: SHIGA