KBC amu madu gaw hpyen yen ni a lam Gumsan Magam Obama hpe tang madun

Rev. Dr. Hkalam Samson, Jinghpaw bunghkaw hte. Sumla: KBC

Jinghpaw Wunpawng Hkalup Hpung Ginjaw (KBC) kawn Amu Madu Hpung Up Sara Rev. Dr. Hkalam Samson gaw mungchying mungshawa uhpung 15 hte rau Amerikan Gumsan Magam Barack Obama hte Yangung Myu hta hkrum zup ai aten shinggyim ahkaw ahkang hte Jinghpaw hpyen yen tsin-yam masha ni a lam hte seng nna tang madun bawngban mat ai lam chye lu ai.

Yangung Myu dakkasu ginra lam yang na Amerikan Sumtsan Salang Rung e KBC, shinggyim ahkaw ahkang shamu shamawt nga ai Equality Myanmar uhpung, Myen Mung Laili Laika Kongsi (hkring hkra) hte hpawn mungchying mungshawa uhpung 15 hte hkying hkrum mi jan hkrum shaga bawngban ai lam rai nga ai.

“Jinghpaw tsin-yam ni hte seng nna madung dat nhtawm anhte tsun ai. Jinghpaw tsin-yam masha ni nhtang wa mayu ma ai. Rai timung hpyen dap wa Jinghpaw Mungdaw shara shagu hkan e nga taw ai majaw n wa gwi ai lam hpe tsun dan ai. Anhte tang madun ai lam hpe sha shanhte gumsan magam hte hkrum ngut sai. Shanhte chye chyalu re ngu ai lam hpe bai tsun ai” nga Sara Samson kawn tsun ai.

2008 ningpawt ninghpang gawda tara gram lajang lam, 2015 ra lata poi tara rap ra na matu ra gadawn lam ngu ai lawnglam ni hpe mung Gumsan Magam Ting Tsing hte hkrum zup ten gumsan magam Obama kawn tsun shaga bawngban mat ai nga shi kawn KNG Jinghpaw Shiga Dap de tsun ai.

“2015 ning gaw ahkyak ai aten re. Yawng jawm galaw sa wa ra ai nga tsun ai. Shinggyim ahkaw ahkang hte seng nna amyu shayi, ramma ni hpe ngam da mung n mai ai. Dai ni hpe ngam tawn da jang simsa lam n mai lu ai. Yawng shingyim ahkaw ahkang hpe manu shadan na matu. 2015 kaw kaja wa galai shai ai lam n byin wa yang gaw mungshawa ni hku nna nsen ja ja rai grau shanglawm na matu ra gadawn ai nga tsun ai” nga shi kawn tsun ai.

Ta tut Myen Mung a galai shai ai lam a ntsa yu n-gun n lu shi nhtawm du na 2015 ning Amerikan asuya kawn hkyak hkyak yu maram sa wa sana ten rai nna Myen asuya maga gaw da tara gram lajang lam, tara rap ra ai ra lata poi byin tai wa lu na lam ni hta ta tut hkrang shapraw na matu ra rawng nga ai lam Sara Samson kawn matut tsun ai.

“Shi tsun ai hte maren ndai mungdan kaw lahkawng lang sa du ai ngu ai lam gaw shi a tsawra myit Myen Mung mungshawa masha ni a ntsa kaja wa nan madun mayu ai masa ni hpe mu lu ai le. Ta tut hkrang shapraw lam hpe mu mada wa na sakse langai re. Raitim n byin wa jang gaw shanhte a kanawn mazum lam mung galik galai rai wa na shadu ai” nga tsun ai.

Myen Mung de masum ya na sa du ai Amerikan gumsan magam Obama gaw November 14 ya jahpawt daw Yangung Myu Atwi-wun Rung dingsa de sa du nhtawm Amyu Sha Dimokaresi Ginjaw (NLD) Ningbaw Jan. Awng San Tsu Chyi hte hkrum shaga let shiga sanglang hpawng hta 2008 ningpawt ninghpang gawda tara garam lajang lam hpe shanawng tsun mat ai nga chye lu ai.

Shana daw de shi hpang jahtum gawan katsan ai sinpraw dingda asia dan kawn Ramma ni hte Yangung dakkasu Lungseng Jubili Gawknu hta hkrum shaga nhtawm ramma ni a ga san hpe htai ya ai lam ni galaw mat ai.

KBC hku nna Amerikan gumsan magam hte shawng ningnan lang hkrum zup ai re lam “ngai hku nna gaw tara rap ra na matu hte simsa wa na mahkrun hta Obama a gawan katsan ai lam gaw ahkyak ai zawn, anhte mungshawa ni a myit lawm ai lam hte mungmasha ni a mabyin masa mung ahkyak ai. Grau nna ahkyak ai gaw asuya a galai shai lam hpe asuya maga nan galaw na matu lit nga ai” nga Rev. Dr. Hkalam Samson kawn KNG Jinghpaw Shiga Dap de tsun ai.

Obama gaw Myen Mung de No. 2 lang hku nna November 12 ya kawn du hpang rai nhtawm 13 ya shani hta e Ne Pyi Daw kaw galaw ai 25 lang na Asian Hkrumra Hpawng de sadu shanglawm ai lam rai nga ai.

Gumsan magam Obama gaw November 14 ya shani shana daw hkying 5:30 ten Myen Mung kawn pru hkawm wa sai rai nga ai.

Posted in: SHIGA