Jinghpaw labau hta kaba dik yawn hkyen hkrum ai akyu hpyi hpawng galaw

Myen asuya dap laknak kaba gap ai lam a majaw Wunpawng Mungdan Shanglawt Hpung (KIO) Du Jawngma ni hkrat sum mat nhtawm yawn hkyen masat dingsat nhtoi hku nna myit dum akyu hpyi hpawng hpe Jinghpaw Mungdaw Myitkyina ginwang Hkristan Ginra hta daihpawt daw hkying 9:00 kawn hkying 12:00 du hkra shawa masha ni galaw ma ai.

November 19 ya shani KIA Ginjaw Hpyen Du Shalat Jawng de Hka Ya Bum na Myen asuya dap kawn laknak kaba hte gap bun ai lam a majaw Du Jawngma 23 hkrat sum mat ai lam hpe yawn hkyen ai masat masa hku nna myit dum akyu hpyi ai lam rai nga ai.

Dai myit dum akyu hpyi hpawng hpe Jinghpaw Wunpawng Hkalup Hpung Ginjaw (KBC) woi awn galaw ai lam rai nna laga makam masham nawku hpung shagu kawn ramma ni hte kanu kawa ni mung tsa lam sa du yawn hkyen lawm ma ai.

Akyu hpyi hpawng hta KBC Amu Madu Rev. Dr. Hkalam Samson kawn akyu hpyi nna n-gun lagaw la na matu n-gun jaw mungga htawn shalai ya ai zawn mungdan uphkang ladat n hkrak ai majaw sum machyi nga ai lam ni hpe mung sanglang dan mat ai.

“Daini Myen Mung hta anhte mungchying mungshawa ni shaning law law hpyen wa marang si hkum nga ai gaw shada da n ju n dawng hkat na n re. Anhte a hpyen asuya masing a majaw rai nga ai. Woi awn ai ni n hkrak ai majaw daini hpa mara n nga ai anhte a mungshawa masha ni si hkrung si htan byin nga ai lam re. Yawng gaw Karai Kasang hpan da ai shinggyim masha ni hkrai re. Raitim ladat a majaw, n hkrak ai ningbaw ningla ni a majaw daini anhte si hkrung si htan hkrum ra ai gaw grai yawn hpa shara re” nga tsun ai.

Akyu hpyi hpawng hta sa du yawn hkyen lawm ai Simsa Lam Akyu Galaw Hpung (PCG) kawn Slg. Lamai Gum Ja gaw si hkum ai lam hte seng nna lahkawng maga na mabyin masa hpe sanglang dan mat ai hta Myen asuya hpe simsa lam hkrum shaga bawngban jahkrup lam hpe dawm kau ai lam snr majan bai baw hpang wa ai lam kun ngu ai ga san 2 hpe san da ai lam tsun ai.

Laning mi jan simsa lam bawngban jahkrup hpawng galaw nga ten asuya ni mahtang she simsa lam hpe n ra sharawng ai majaw ndai zawn gasat gala lam hte jahte tam nga ai lam re nga nna American, British, Europa, UN hte Japan mungdan ni kaw laika ka shana da sai” nga tsun ai.

Asuya maga kawn ya ten du hkra htang shana wa ai lam laga n nga ai rai tim Gumsan Magam Slg. Ting Tsing kawn VOA Shiga Dap de laksan hkum shaga lamang hta dai gap ai lam mabyin masa hpe teng ai hku tang madun na matu matsun da sai lam tsun shaga mat ai.

Jinghpaw Wunpawng labau hta masat ding sat nhtoi hku nna myit dum akyu hpyi hpawng hpe Jinghpaw Mungdaw shara shagu hta 3 ya tup matut galaw mat wa na rai nna November 20 ya kawn 22 du hkra re lam Jinghpaw mungshawa ni kawn chye lu ai.

Myit dum akyu hpyi hpawng de sa du shanglawm ai ni hpe yawn hkyen ai masat masa hku nna ta lahpum hta sumpan achyang gayawp shangun nna arau sha lata gindun let akyu jawm hpyi ai lam galaw mat wa ai.

November 19, mani gasat gala ai lam KIO ginra shara 3 de Myen asuya dap ni shang gap ai hta Nawng Lut ginra na KIA shawnglam dap dang hpe lu zing la kau nhtawm KIA Dap Ba (2) npu Dap Dung (11) hte Ginjaw na Hpyen Du Shalat jawng hta mung lawng malawng si hkala hkrum mat ai re nga Slg. Lamai Gum Ja tsun ai.

Posted in: SHIGA