Wunpawng Mungdan Shanglawt Hpung (KIO) hpe Myen asuya dap ni gap gasat ai lam mabyin walang gale ai jasat re ngu aja awa jahpyak ai lam Amyu Sha Hpyen Masa Mungmasa Dap Hpawm (UNFC) kawn November 20 ya shani tsun dat ai.
November 19 ya shani Myen asuya dap jung ai shara Hka Ya Bum daju Hk.M.Y Masat (389) kawn laknak kaba hte gap ai lam a majaw KIA Hpyen Du Shalat Jawngma 23 si mat nhtawm marai 20 hkala ai lam a ntsa Myen asuya dap a sat lawat hpe aja awa jahpoi ahkyak dat ai lam rai nga ai.
“Majan gasat sana rai jang Warning jaw ai zawn, hkap hkan na matu mahkrun mung n nga ai masa kata n dum shami gap ai dai gaw n hkrak ai. Hpyen hpe tinang gasat ai gaw jaw ai. Mungmasa mawru hta hkan nna gap hkat jahkring lam tsun shaga taw nga ai ahkying aten re. Manang wa hpe ahkang n jawng ai. Mahkawng nga ai aten kaw nan laknak kaba hte gap ai. Walang gale ai nan re” nga UNFC a Shingtau Amu Madu (1) Dukaba Hkun Uk Ka tsun ai.
Ya na zawn, gap gasat ai lam gaw Mungmasha Rapdaw Ningbaw Slg. Shwi Man a 2008 gaw da ai tara hpe du na 2015 ning ra lata poi ngut jang she gram lajang lam mai byin sana re nga tsun ai lam hte mung wa ginrawn taw ai majaw hpyen masa mungmasa gumchyak maw lanyet ai masa langai re ngu shadu ai lam ndau laika hta shaleng da ai.
Amyu sha laknak hpai rawt malan hpung ni hte hpyen masa hku nna gap hkat jahkring lam bawngban nga ten hta mungmasa hku na 2008 hpaw shabawn hkrang gram lajang nhtawm Dimokaresi gawgap na matu mungmasa pati ni, Dimokaresi uhpung ni hpyi shawn nga ai lam hpe Slg. Shwi Man kawn pat shingdang kau ai majaw mungmasa hku nga yang shamawt n mai ai masa hta du taw ai nga Dukaba Hkun Uk Ka tsun ai.
“Gap hkat jahkring sana ngu ai uhpung ni hpe mung gap hkat jakring hkrum shaga nga ai aten kaw nan yupnga magra nna hkap hkan na n mai ai aten gap ai nga yang maga mi de hpyen n-gun kaba ai lam hpe jai lang nna la-ba kaup mayu ai zawn byin ai le. Ndai gaw hpyen masa hku dip gamyet na matu snr mungmasa hku na dingbai dingna jaw ai kun ngu anhte dai zawn shapraw dat ai ga re” nga tsun ai.
Simsa lam lu wa na matu makam gawgap shakut nga ten hta Myen asuya hpyen dap hku nna hpyen masa hku yupnga maga n-gun jat gasat nga ai lam ni gaw simsa lam hpe Myen hpyen dap maga kaja wa ra sharawng ai myit jasat rawng/n rawng hpe ga san san hpa tai wa shangun nhtawm, makam gawgap sa wa ai lam hta mung dingbai dingna byin shangun ai lam ni hpe dum shai shangun mayu ai lam ndau laika hta lawm nga ai.
UNFC hku nna mungdan ting madang gap hkat jahkring lam hte simsa lam hpe dumhprut shangun ai, masa shai shangun ai jasat ma hkra hpe tawk hprut ninghkap mat sana re lam ka shalawm da ai.
0 comments:
Post a Comment