Adaw-atang hprut, sat hkrum ai hpe company gumhpraw jaw na lam tsun

Company kabai kau ai shingbut kaw Yemase hta ai ni, Hpakan lungseng maw

Jinghpaw Mungdaw Hpakan ginwang Lawng Hkang, Madang Yang mare kawn asak 20 ning pang Slg. Hpuklawng Gum Ja Awng ngu ai Zelum a si mat ai amu hte seng nna Tau-pa Chye seng htu seng shap company gaw machyi sum gumhpraw kyat sen 200 jaw na nga tsun mat ai lam si mat ai wa a kahpu Slg. Brang Nan kawn tsun ai.

Si mat ai wa a dinghku masha ni gaw Hpakan ginwang Jinghpaw Wunpawng Htunghking Hpung hpe bawngban jahkrup ai lam ni galaw ya na matu garum hpyi da ai majaw Jinghpaw Wunpawng Htunghkying Hpung gaw machyi sum gumhpraw kyat sen 4,000 hpyi da ai raitim kyat sen 200 sha jaw na nga, daini November 10 ya shani lahkawng maga hkrum shaga ai ten tsun mat ai nga kahpu Slg. Brang Nan tsun ai.

“Anhte gaw 4,000 ngu nna n masat da ai sha, Jinghpaw htunghking hte maren hparan ya na matu yawng ap dat ai. Dai ni company ni sen 200 jaw na nga tsun wa ai. Nye kanau a matu manu dawdan n mai ai majaw myit dik ai. Myit n dik ai n re. Jinghpaw htunghkying hpe hkungga ai hku nna shanhte hparan ya ai hpe hkap la ai hku re. Myit dik ai lam chyawm n nga ai” nga shi kawn Mizzima Shiga Dap de tsun ai.

Tau-pa Chye Company kawn jak kaba (ga htu jak) gau ai wa nan sat da ai re nga Hpakan ginwang Balik Dap kawn jep san ai shaloi hkam la ai nga matut tsun ai.

“Company hpe ya Balik Dap kawn san jep taw ai. Company na ga htu jak gau ai wa nan si mang hpe shamat kau ai ngu nna hkam la ai” nga tsun ai.

Ya na zawn zingring zingrat sat hkrum ai manghkang htawm hpang de n byin na matu hte Jinghpaw amyu sha ni sha n ga Myen mung masha mi rai rai manu shadan wa na matu Myen mung ting hpe chye shangun mayu ai lam mung re nga shi kawn matut tsun ai.

Lai wa sai October 31 ya shani Wa Je Maw hta Tau-pa Chye seng htu seng shap company kawn shingbut sha ru ai aten baw, lagaw, lata hte hkrum hkrang daw chyen mali di mat wa ai Slg. Gum Ja Awng a mang hpe mu ma ai. Dai moi mang hpe November praw 2 ya shani wan nat nna makoi mayang dat ya sai lam chye lu ai.

Tau-pa Chye Company kawn ga htu jak gau ai wa; Ko Zaw U hpe Hpakan Balik Dap gaw Slg. Gum Ja Awng si ai amu hte seng nna jep joi ai lam ni galaw nga nna company hku nna gaw Jinghpaw Wunpawng Htunghking Hpung hte Jinghpaw htunghking hku nna bawngban jahkrup taw ai nga Tau-pa Chye Company kawn rung masha Slg. Win Nai tsun ai.

“Shawng e gaw dam hkum ai ram sha re. Rai timung ya gaw sharut gyi ai hpang she anhte company kawn n chye nna mahkyit hkup dat ai. Anhte mung myit n hpyaw ga ai, anhte ya yang Jinghpaw htunghking hte manghkang madu ni hte jahkrup taw ai” nga shi kawn Mizzima de tsun ai.

Si mat ai wa; Slg. Gum Ja Awng hta ma langai, ma hkum hte kasha kanu ngam nga ai rai.

Posted in: SHIGA