Tuesday, November 4, 2014

N tara je yang hkrum ai Jinghpaw hpyen yen 2 dat ya na akyu hpyi lamang galaw

Shwe Tset hpyen yen dabang na Slg. Lahpai Gam hte Slg. Brang Yung yan gaw KIA masha re ngu n tara rim zingri hkrum ai shaga, shaning galu htawng jahkrat hkrum ai re

Jinghpaw hpyen yen tsin-yam masha Slg. Lahpai Gam hte Slg. Brang Yung yan hpe lawan dat ya na matu alak mi akyu hpyi ai hpawng hpe daini November praw (4) ya shani Myitkyina Ginwang Shwi Tset mare na Jinghpaw Wunpawng Hkalup Hpung nawku jawng gawknu e galaw sa wa ai hta mungshawa marai 1,400 jan sa du shang lawm ai nga Tara Kasa. Slg.G Ma Hka kawn tsun ai.

Daini akyu hpyi ai lam hte mungshawa sanglang hpawng hpe Myitkyina Ginwang Shwi Tset mare na Jinghpaw Wunpawng Hkalup Hkristan nawku hpung gawknu e jahpawt hkying 9:00 kawn 12:00 du hkra galaw ai hta Slg. Lahpai Gam hte Slg. Brang Yung yan n tara rim hkrum ai lam hpe Jinghpaw Wunpawng Hkalup Hpung Ginjaw (KBC) Amu Madu Dr. Hkalam Sam Sun, Shwi Tset Hkalup Nawku Hpung Ningbawng Sr. Mahka La Sam, htawng masha lahkawng a dinghku masha ni hte Tara Kasa. Slg. G Ma Hka ni kawn shan-yan hpe n tara rim sharen da ai amu; shawa masha hpe sanglang dan ngut ai hpang akyu hpyi ai lamang galaw ai lam rai nga mali ai.

“Lamang shawng daw hta kun dinghku nta masha ni, Shwi Tset nawku hpung sara ni gaw amu hte seng nna sanglang dan ai. Mungshawa maga na ga san san ai lam ni nga ai. Ya, Obama (Amerikan gumsan magam) du ai shaloi mungmasa amu hte sharen da ai ni hpe dat ya na. Dai kaw lawm na hpe myit mada da ai. Ya na masa hku nga yang hpa n re ai masha ni hpe pyi dat ya ai. N tara rim hkum ai masha ni gaw mungdan asuya kaw na da-sang galaw ai masa re” nga Tara Kasa. Slg. G Ma Hka tsun ai.

Du na November 12 hte 13 ya shani Ne Pyi Daw hta galaw na Asian Hkrumra Hpawng de sa du na Amerikan Gumsan Magam Slg. Obama rai n du shi yang Gumsan Magam Slg. Ting Tsing asuya gaw mungmasa amu hte sharen da ai htawng masha ni hpe galaw ya na matu nga ai raitim Slg. Lahpai Gam hte Slg. Brang Yung yan hpe chyawm dat ya na masa rai n pru ai lam shi kawn matut tsun ai.

Slg. Lahpai Gam hte Slg. Brang Yung yan hpe n tara ai uhpung matut mahkai amu hte jahkrat da ai htawng dam 2 ning hpe shaprai kau nna kapaw ai amu hte Slg. Brang Yung hpe htawng dam; 19 ning hte Slg. Lahpai Gam hpe htawng dam; 18 ning jahkrat da ai re nga November praw 1 ya shani na ninghtoi hte shapraw ai asuya n-gup Myanma Alin shi laika hta shaleng da ai.

Slg. Lahpai Gam hte Slg. Brang Yung yan hpe n dat dat ya ai lam gaw gumsan magam Slg. Ting Tsing wa nan munghpawm amyu sha ni zang ayai mat hkra galaw nga ai jasat re nga Tara Kasa. Slg. G Ma Hka kawn tsun ai.

“Shan lahkawng hpe hpa majaw n mai dat dat ai kun? Slg. Ting Tsing a n-gup hta galoi mung noi nga ai Du Ta Wun Aye Tung Pa gaw amyu sha kahkyin gumdin lam n hten run lam, munghpawm n hten run hkra ngu ai tsun nga ai. Ndai hku dingyang naw galaw nga na rai yang amyu sha kahkyin gumdin lam hten run hkra galaw ai mung shi sha re. Shing tsun ai hte galaw ai n bung pre ai. Byin wa ai manghkang ni mung shi kaw lit nga ai ngu na sha tsun mayu ai” nga shi kawn matut tsun ai.

Slg. Lahpai Gam hte Slg. Brang Yung yan lawan lawt wa na matu hte shan lahkawng ntsa shinggyim ahkaw ahkang tawt lai hkrum ai zawn Jinghpaw Mungdaw masha ni matut nna n hkrum katut na matu yaw shada let mungshawa sanglang hpawng galaw ai lam re nga chye lu ai.

Shan lahkawng hpe n tara rim sharen da ai amu hte seng nna gumsan magam Slg. Ting Tsing, Salang Jan. Awng San Tsu Chyi hte Myen Mung shinggyim ahkawng ahkang komishin ni de laika ka hpyi shawn da ai zawn, October 13 ya shani mung Jinghpaw Mungdaw shinggyim uhpung uhpawng 34 lata masat jawm ka nna gumsan magam Slg. Ting Tsing hpang de kahtap hpyi shawn ai rai nga ai.

Dai hpang shan lahkawng lawt wa lu na matu mungshawa daw hku nna mung Rev. Dr. Hkalam Sam Sun gaw “ndai lang hkalup hpung ni sha n rai ai sha nga manga hkristan ni yawng pawng hpawm nna wu wu di di ninggun madun na matu” Shiga Laika sanglang hpawng hta tsun mat wa ai.

2012 ning. July shata praw 9 ya shani Shwi Tset mare hpyen yen tsin-yam dabang hta shanu shingbyi nga ai kawn shanhte a kashu kasa ni a jawng lung jarik tam na matu Dalaw mare de shabrai hku nna Dumsu/Wuloi gau chyang na matu rawt mat wa ai kawn Myen asuya dap a Hk.L.Y Masat (37) dap hpung ni Shanglawt magam gun ni re ngu nna rim mat ai lam rai nga ai.

Myen asuya dap ni rim hkrum ai ni hta Dumsu madu marai 3 hte rau laga marai 2 mung lawm nna Dumsu yawng 28 tup hte hpawn Dumsu madu ni hpe dat dat ya sai raitim, Dumsu gau chyang ai marai 4 hpe gaw Dalaw Hpung Kyi Jawng e rim zingri ai lam dinghku masha ni tsun ai.

2013 ning November hte December shata laman n tara uhpung matut mahkai tara daw; 17(1) hte kapaw ai tara ni hte Slg. Lahpai Gam hpe htawng dam; 20 ning, Slg. Brang Yung hpe htawng dam; 21 ning jahkrat da ai rai nga ai.


0 comments:

Post a Comment