J.W hpyen hprawng lanu lahku jinghkri RANIR hpaw

Miwa ga jarit KIO uphkang ginra de du nga ai J.W hpyen hprawng masha ni a matu lanu lahku bungli jawm galaw sa wa na jinghkri RANIR hpe July praw 7, bat hpang mali ya shani, KIO ginjaw Laiza e hpaw dat sai re.

Jinghpaw hku “Hpyen Yen Lakawn Lanawn Jinghkri” ngu ai Relief Action Network for IDP (Internally Displaced Person) and Refugee, RANIR hpe KIO, Hkristan nawku hpung ni hte asuya n re ai uhpung ni jawm shanglawm hpaw ninghtan ai re.

Jinghkri (network) a lit nga hte coordianator-1 La Rip gaw jinghkri hpaw ra ai hte seng nna ndai zawn KNG de tsun ai, “Myen hte Shanglawt majan matut byin na, n byin na hkrak n chye ai kata, mare buga nhtang wa mat ai lam n nga KIO hpyen hprawng dabang ni hta jam jau hkrum nga ai mung shawa ni hpe lakawn lanawn na yaw shada let RANIR hpe hpaw ai re.”

KIO Laiza hpyen yen labang de sa du gawan ai J.W Hkalup Hpung Ginjaw, KBC sara ni

Ndai Jinghkri n hpaw shi yang, madung KIO ginjaw Laiza hte kaga Miwa ga jarit makau de du nga ai hpyen hprawng ni hpe lit la garum jaw nga ai gaw KIO Hpyen Yen Lakawn Lanawn Komiti hte London-daju Health Unlimited (HU) re.

Komiti a July praw 6 ya du hkra jahpan hte maren, Miwa ga jarit ginra yawm dik 12 hta du nga ai hpyen yen masha yawng 15,791 re. Shanhte gaw June praw 9, Myen hte Shanglawt majan byin hpang ai kaw nna Miwa ga jarit de koi yen hprawng ai ni rai nga ai.

Shanhte hpe KIO kaw nna nga shara hte n-gu malu masha ni lajang ya nhtawm HU gaw tsi mawan hte jigrawng sut ni loi li garan jaw ai lam chye lu ai.

Laiza hpyen yen dabang de du nga ai tsinyam ni gaw hall gawknu ni hta hpreng shingbyi nga ra ai ten, shanhte nkau gaw Hkali, Shagri Bum, Mak Hkalawng Chyang (Dengue) hte Kan mashe ana ni byin nga ai majaw, dum nta dinghku san n lu galaw ya ai kata, ana chyam bra wa na mung tsang ra masa re lam, La Rip madi madun ai.

Mungdan gadaga a garum ntum lam n hkan wa yang gaw, KIO hte HU hku nna sha tsinyam masha ni hpe aten galu garum jaw lu na tsepkawp n mai byin ai lam, chye lu ai.

Ya ten tsinyam ni madung ra ahkyak nga ai gaw, malu masha, nga shara ginsup nta san san, tsi mawan hte ma ni a hpaji sharin lam re lam, matut chye lu ai.

Hkyak hkyak garum ntum ra kadawn nga ai hte seng nna RANIR lit nga La Rip sadi jaw ai hta, “ndai laman garum ntum lam ni n lu yang, du na bat lahkawng a hpang malu masha ra kadawn ai lam byin wa nna, hkyak hkyak hkye mawai bungli galaw ra wa na re,” nga ai.

Posted in: SHIGA