Ba-Ka-Pa ginra e KIA Dapba (6) hpaw shabawn

KIA Dapba (6) hpaw poi lamang, Mai Ja Yang

Lahta Sam mung, shawng de Myen Mung Kummyunit Pati, Ba-Ka-Pa ginra e Wunpawng Mungdan Shanglawt Hpyendap, KIA Dapba (6) hpe Feb 26, bat Manga Ya shani, tara shang hpaw shabawn dat sai re.

Dai re majaw Dapba (6) gaw shawng de Ba-Ka-Pa (Communist Party of Burma, CPB) ni nga ai Mungbaw, Munggu hte Hpawng Seng ginra masum hta daju mat wa na re.

1989, CPB hten mat wa ai hpang, dai ginra e 2011 ning kaw nna hpyen masa shamu shamawt hpang wa ai, CPB Jinghpaw hpyenla dingsa ni woi ai United Kachinland Army (UKA) dap hpe KIA Dapba (6), ngu nna bai hpaw ninghtan ai lam mung re.

“Mi na Munggu kaw nna UKA 38 hte 36 dap hpe Dapba (4) mi woi la kau ai. Dai hpe bai nhtang ap ai lamang” re nga UKA hpyendu dingsa langai KNG Jinghpaw Shiga Dap de tsun ai.

Dapba n’nan hta ra ai, laknak machyu pala hte masha n-gun, ginwang, dap daw, dap chyen ni ap ai lamang hte Dapba n’nan wunli la akyu hpyi hpawng lamang hpe KIA Dapba (3) hte Dapba (4) daju ai Mai Ja Yang e galaw sai.

Dai lamang hpe KIA ginjaw Laiza de na Tau Dap Awn Daju ni, ginjaw salang ni sa du nna woi awn galaw ai lam re.

Myen asuya gaw “NCA, mungdan ting gap hkat jahkring ga sadi hpe hpyen masa mungmasa laknak langai zawn jai lang wa ai hpe mu ai. Ya na zawn sai garan dip sha na, amyu lakung ni lapran shada da n ju n dawng hkat hkra shabyin nga ai Myen hpyendap a sat lawat hpe ja ja ninghkap ai lam,” UNFC, gap hkat n jahkring ai amyusha hpyen masa mungmasa daphpawm gaw Feb. 21 hta ndau dat sai re.

Maning October NCA sen htu ngut ai hte, Sam mung dingda de jung ai RCSS/SSA Sam hpyen-dingda gaw, shawng de tinang dap hkrak n nga ai Lahta Sam mung KIA Dapba 4 hte Balawng PSLF/TNLA ginra ni de, maja maden lung wa nna dap jahkrat nga sai re. Bai nna Balawng ni hte laja lana gap hkat ai re.

Ning re ai aten KIA Dapba (6) hpe Lahta Sam mung Ba-Ka-Pa ginra hta hpaw wa ai lam rai nga ai.

Posted in: