Myitkyina, Jinghpaw Mungdaw — Myitkyina ramma ni gaw lamang mahkyen nkau n galaw ai sha, 55 ning hpring Mung Shawa Rawt Malan Nhtoi masat lamang hpe Shatapru Manau Wang e mani galaw sai re.
Masat nhtoi hta sha-ang galaw ai 4 lang na ramma ginlung akyu hpyi hpawng e, ‘Mungdan mahkawn hkawn na & dawnghkawn hkungga jaw’ hte ‘Rawt Malan Mungga Hti’ ngu ai lamang n galaw na tinang jahkring kau ai re.
Hpa majaw nga yang, Manau Wang kata ndai lamang galaw na Mungdaw asuya hte Wunpawng Htunghking Ginjaw kaw nna ahkang n jaw ai lapran galaw re majaw, dai lamang lahkawng n galaw na jahkring kau ai re nga, lamang woi awn ai ni KNG Jinghpaw Shiga Dap de tsun ai.
2011 ning Myen asuya hte Wunpawng Mungdan Shanglawt Hpung KIO lapran majan ningdaw kalang bai byin wa ai hpang, mungdan kata shinggan Jinghpaw Wunpawng amyusha ni lapran KIO dawnghkawn hpe ‘amyusha dawnghkawn snr mungdan dawnghkawn’ hku nna n-gun jaw jai lang wa ai re.
Bai nna ‘Rawt Malan Nhtoi’ hpe mung ‘Mung Shawa Rawt Malan Nhtoi’ ngu galai jai lang wa ai re.
2013 ning kaw nna, February praw 5 KIO a Rawt Malan Nhtoi hta J.W Hkristan nawku hpung hkum hkra shanglawm ai ramma ni a ginlung akyu hpyi hpawng kaba hpe shaning shagu galaw nga ai re.
2014 ning 2 lang na ramma ginlung akyu hpyi hpawng hpe shawng n’nan Manau Wang kaw galaw ai shaloi, Manau Shadung ntsa amyusha dawnghkawn noi da ai hpe asuya ahkaw ahkang lu ni atik anang masa hte bai shayu kau shangun wa sai re.
Ndai lang na lamang mahkyen lahkawng hpe gaw tinang nan n galaw na dawdan jahkring ai lam rai nga ai.
0 comments:
Post a Comment