Kambaiti de lung ai PJS hpung hpe Washawng gate hta pat hkum da

 

Washawng Gate e shingdang da hkum ai, Pa Jasan hpung ni

 

Daini Myitkyina kaw nna Kambaiti de lung wa ai Jinghpaw Wunpawng mung shawa Pat Jasan Hpung mawdaw yan hpe Kambaiti-Chipwi Lambraw, Washawng Myen asuya gate kaw nna tsepkawp n shalai hkum pat da hkrum nga ai re.

Dai gate hta Myen asuya magam dap manga--- hpyendap, pyada, laksan pyada (SB), Ts.Y.Hp hte L.W.K ni dung ai re. Ya ten, dai hta pat da hkrum ai PJS masha n-gun 1,000 mi jan re lam, PJS ningbaw ni KNG Jinghpaw Shiga Dap de tsun ai.

Waimaw ginwang pyada du wa gaw dai ni hkying 2 daram e PJS ningbaw ni hte Waimaw e hkrum ai shaloi, ‘shi hta hpa daru magam n nga ai lam, lahta na matsun hte maren Kambaiti de n lung na pat hkum ai re lam’ tsun ai hpe chye lu ai.

Dai hte maren, Washawng gate hta hkap sin ai hpyenla ni mung ‘lahta na aming hte maren pat hkum ai re lam’ dai hku sha PJS ni hpe tsun nga ai lam chye lu ai.

Ya na zawn pat da hkrum tim, PJS ni bai nhtang wa mat ai lam n nga ai sha bai du jat nga ai hte, shanhte dai shara e nan shara la ginsum jahkrat let nga nga ai lam, PJS ningbaw ni tsun ai re.

Bai nna, Waimaw mare e mung PJS n-gun 1,000 mi jan dap jahkrat nga ai rai nna, masha n-gun n’nan matut du jat nga dingyang re lam, dai hta Lahta Sam mung na mung shawa ni mung sa wa nga dingyang lam kaw re lam, matut chye lu ai.

Putau hte Sumprabum ginra hta lai nna, ngam ai Jinghpaw mungdaw hte Lahta Sam mung (Kachin Sub-State) lahkawng, Pat Jasan Ginra yawng 19 na mung mare masha ni yawng ndai Kambaiti pat jasan masing hta shanglawm ai lam, Waimaw e du nga ai PJS ningbaw ni tsun ai.

Ya na zawn Washawng gate e pat hkum da hkrum ten, daini Myitkyina e PJS ningbaw ni hte asuya ahkaw ahkang lu ni lapran, ‘jahkrup jahkrum ai lam ni’ galaw nga ai lam chye lu ai re.

Posted in: