Kambaiti BGF, pyitusit ginra kani pat jasan na asuya shimlam n lu jaw

Myen asuya npu BGF hte pyitusit uphkang ginra, Kambaiti e mu lu ai kani sun ni

BGF, Jarit Sin Dap hte pyitusit n’gawn hpyen ni uphkang ai Kambaiti ginra e kani sun hkyen jasan masing hta asuya shimlam matut n lu jaw sai tsun wa ai hpe chye lu ai.

Kani sun madu ni wang da nhtawm lahpraw gap, nlung kabai ladat hte gasat ai majaw n-gun 300 daram Pat Jasan Hpung gaw Kambaiti, Maw Si Tung ginra e masum ya nga nna kani sun n lu hkyen ai sha, February praw 5 hta bai nhtang wa ra sai re.

Hkan nang ai asuya pyada hte hpyenla ni gaw kani sun madu ni a grau grau ninghkap gasat ai lam ni hpe tang du hkra n lu pat ya ai majaw shimlam n nga nna, PJS hpung bai pru mat wa ai lam rai nga ai.

Dai re majaw, Jinghpaw mungdaw asuya hku nna shimlam jahtat ya na matu, hkringmang daju Slg. Lajawn Ngan Seng de dai shani sha PJS hpung hku nna laika hte hpyi lajin dat ai re.

Raitim shimlam matut n lu jaw ai lam hpe mungdaw asuya hte Myen hpyendap Dingdung Daw Daju (M.P.Hk) tai-mu Brig-Gen Win Bo Shein hku nna mung, ndai bat pru de htang shana wa ai lam, PJS ningbaw ni KNG Jinghpaw Shiga Dap de tsun ai.

Asuya maga, “mungdan asuya masing hte 2018 ning jahtum tawn kani pat jasan masing galaw nga dingyang ten, Kambaiti de PJS ni lung wa yang ginra masha ni hte manghkang byin wa chye ai” nga tsun wa ai hpe chye lu ai.

Jinghpaw mungdaw kata kani sun law dik ai Kambaiti ginra gaw, shawng de Zahkung Ting Ying woi awn ai NDA-K ginra, ya Myen asuya BGF hte pyitusit uphkang ai ginra re.

Mungkan e No.2 kani law dik hkai ai Myen mung kata kani sun law dik gaw Sam hte Jinghpaw mungdaw lahkawng hta re. Dai hta bai, Naypyidaw asuya ntsa sadi dung ai BGF hte pyitusit wuhpung wuhpawng ginra ni hta kani hpe madung hkai ai rai nga ai.

Bai nna Myen asuya maga, mungkan e ‘kani hkawhkam’ nga nna mying pru ai, n nga mat sai Hkun Sa hte Asia World Company (Myanmar) madu Lo Hsing Han, yan hpe ahkyak n la ai sha, shimlam mahtang jaw nna makawp maga wa sai re.

Ya ten, Kambaiti de lung na J.W Hkristan nawku hpung ni woi awn ai PJS hpung gaw, n-gun 1,200 jan hte Waimaw mare nawku hpung wang ni hta dap jahkrat nga ai re. Masing ngut nna wa ai, Hugawng Pa hte Shangaw Krung maga na PJS hpung ni mung Waimaw de n-gun gahkying du nga sai lam chye lu ai.

Asuya shimlam n jaw sai hpang, BGF, pyitusit uphkang ai Kambaiti ginra hta kani pat jasan masing galaw na n galaw na lam ntsa Jinghpaw mungdaw pat jasan ginra shagu na ningbaw ni zuphpawng galaw let dawdan na masa nga ai lam chye lu ai.

Posted in: