Waimaw e PJS n-gun jat nga dingyang

Waimaw e dap jahkrat nga ai PJS hpung ni

Kambaiti, BGF Jarit Sin Dap hte pyitusit ginra kata kani yi dan shamyit masing hta asuya shimlam n jaw sai lam tsun tim Waimaw de mungshawa Pat Jasan n-gun gahkyin ai lam dingyang rai nga ai re.

Ya ten Jinghpaw mungdaw PJS ginra shagu na ningbaw ni hte masha n-gun 1,000 mi jan gaw Waimaw mare nawku hpung ni hta dap jahkrat nga ai re. Rai nna, Kambaiti pat jasan masing hte seng nna PJS ningbaw ni lapran zuphpawng matut manoi galaw nga ai lam, Waimaw Ginra PJS shiga lawk tsun ai.

Kambaiti de kade n na yang PJS hpung ni bai rawt na masa nga ai lam matut chye lu ai.

PJS Dap Dung ningbaw ni hte hpyenla ni lapran mung, ‘kani yi hpe mu sha mu kau da nna n lu hkyen yang myit n dik dum ai ga ni’ tsun garu nga ai hpe mung chye lu ai.

Kani yi eka hkying lam nga ai Kambaiti, Maw Si Tung ginra de ndai February praw 2 hta PJS hpung langai du wa sai re. Raitim, shanhte gaw kani sun madu ni a lahpraw gap, nlung kabai bun ai lam ni grau grau laja lana hkrum wa ai hpang, kade n na ai sha February praw 5 hta bai pru mat ai re.

Mi na hta shimlam grau jahtat ya na matu, mungdaw asuya de tang shana ai raitim mungdaw asuya hte Myitkyina daju Dingdung Daw Daju (M.P.Hk) hku nna mung shimlam matut n lu jaw sai lam tsun wa ai lam, PJS ningbaw ni tsun ai.

Ndai zawn re ai kata, PJS hpung ni Kambaiti de bai lung wa yang gaw kani sun madu ni a mi hta grau ninghkap gasat ai lam hkrum wa chye ai lam maram lu ai.

Posted in: