Zika ana Myen mung htingbu Miwa, Htai de chyam

Zika ana kumla

Jigrawng kawa nna byin ai Mak Hkalawng Chyang (Dengue Fever) kumla hte bung ai ‘Zika Virus’ ana zinli gaw, ya Myen mung a htingbu Miwa hte Htai mung ni hta chyam bra nga sai lam, Amerikan ana ahkya makawp maga dap (CDC) tang madun ai.

Shawng n’nan Zika ana kap ai asak 34 ning Miwa amyusha langai hpe February praw 5 hta tsi jep mu ai lam, Miwa asuya shiga lawk ni tsun ai. Dai Miwa la wa gaw, ya ten ‘Zika’ ana chyam bra nga ai Dingda Amerika, Venezuela mungdan kaw nna Miwa mung de ndai shata praw hta bai du shang wa ai re.

Bai nna, Htai mung dingdung kaw nna Taiwan de bungli sa galaw ai asak 24 ning Htai ramma langai hta mung ‘Zika’ ana kap ai lam hpe Taiwan Hkamja Dap gaw January 10 hta tsun ndau wa sai.

Ndai ana zinli gaw 1947 grupyin Afrika Dan, Uganda mungdan e shawng byin hpang ai re lam, Mungkan Wunpawng Hkamja Dap (WHO) tsun ai.

Raitim, 2014 January kaw nna 2016 February 5 laman, mungdan 33 hkan e ndai ana chyam bra taw nga sai lam hpe WHO a February 5 ndau hte maren chye lu ai.

Zika ana gaw Aedes jigrawng hpan gawa ai kaw nna byin ai re. Ndai ana hte seng nna, ya ten du hkra makawp maga tsi (vaccine) hte shamai shatsai tsi n nga shi ai majaw jigrawng n gawa hkrup hkra sadi ra na hta lai kaga ladat n nga ai lam, WHO sadi jaw tawn ai.

Posted in: