Daini kalang bai, mungshawa Pat Jasan hpung ni Kambaiti de rawt na hkyen nga sai hte rau kani yi madu ni shanhte hpe ninghkap na matu lam hkap nga sai lam, chye lu ai.
Myitkyina kaw na PJS n-gun 1,000 jan hte Waimaw kaw na PJS n-gun 1,000 jan gaw shani ga-ang a hpang Kambaiti de rawt na re lam, Waimaw Ginra PJS ningbaw langai KNG Jinghpaw Shiga Dap de tsun ai.
Ndai PJS hpyen hpung hta Myen asuya maga shimlam jaw ai pyada, hpyenla ni kaga mi n lawm sai lam, Waimaw Ginra PJS ningbaw ni tsun shateng ai re.
Raitim kani yi madu ni a lam hkap ninghkap ai lam ni hpe hkang zing na asuya hta lit nga na re lam, PJS ningbaw ni tsun ai.
Lai wa sai bat mi jan hta n-gun n law ai PJS hpung langai Kambaiti, Maw Si Tung kani yi de du ai raitim yi madu ni a matut manoi lahpraw nlung ni hte ninghkap gasat hkrum ai majaw bai nhtang wa ai re. Dai hpang, ya kalang bai PJS n-gun kaba hte lung wa ai lam re.
Jinghpaw mungdaw kaga shara ni hta kani yi tsai mat ai daram PJS hpung ni hkyen shamyit kau ngut sai ten, ya asuya uphkang ai Jarit Sin Dap (BGF) hte pyitusit ginra Kambaiti hta gaw kani yi eka hkying kahtap naw ngam nga ai re.
0 comments:
Post a Comment