Ramma ni akyu hpyi hpawng hte Rawt Malan masat nhtoi galaw na

February praw 5, 2016, 55 ning hpring J.W Mungshawa Rawt Malan masat nhtoi lamang hpe ramma no Manau Wang e galaw na hkyen nga yang, Myitkyina

February praw (5), hpawt ni ang ai 55 ning hpring Jinghpaw Mungshawa Rawt Malan Nhtoi hta, Jinghpaw Wunpawng ramma ni a 4 lang na ginlung akyu hpyi hpawng kaba hte masat lamang hpe Myitkyina mare Manau Wang e galaw na re.

Lamang hta Mungdaw kata simsa lam lu na matu akyu hpyi la na gaw madung rai nna, ramma ni hpe ya ten tinang ginra kata byin pru nga ai mungmasa, hpyen masa hte IDP hpyen yen masa lam ni hte seng nna mung alak mi lakjet ni hkyen tawn ai lam, lamang woi galaw ai hta shanglawm ai Sara Ja Yung tsun ai.

Shi matut tsun ai hta, ndai Rawt Malan Nhtoi masat akyu hpyi hpawng kaba hpe Myitkyina mare Hkristan nawku hpung shagu shanglawm woi awn galaw ai rai nna, lamang de ramma ni hkying mi jan sa du na maram tawn ai, nga ai.

Ndai lamang hpe Manau Wang e galaw na matu Wunpawng Htunghking Hpung Ginjaw myit n hkrum tawn ai lapran galaw ai lam mung re nga, Sara Ja Yung Jinghpaw Shiga Dap (KNG) de tsun ai.

Mungdaw asuya ahkang n jaw ai majaw Htunghking Ginjaw kaw nna mung Manau Wang e n galaw yang kaja na re lam ramma ni hpe tsun tawn ai nga, mying n tsun mayu ai Htunghking Ginjaw Salang langai tsun ai re.

2011 ning Myen mung kata hpyen hpyi galai democracy asuya galai wa ai hpang, Shatapru Manau Wang kata Manau poi sha n ga shawa hte seng ai poi lamang ni galaw ai ahkaw ahkang hpe, Mungdaw asuya kaw nna manat mat wa ai re.

Posted in: