Kambaiti pat jasan masha 2,300 jan hpe asuya matut hkum da

Myen asuya Washawng gate na n shalai ai majaw, lam makau gimsum jahkrat nga ai Mungshawa Pat Jasan Hpung

Myen asuya gaw kani yi shamyit ai masing n pat hkum ai lam tsun nga tim, ya Kambaiti pat jasan hpung, mungshawa n-gun 2,300 jan hpe Washawng Gate e lahkawng ya matut manoi pat hkum tawn ai re.

Kambaiti de lung wa ai lam nmaw kaba, Myen asuya Washawng Gate hta tsepkawp n shalai ai majaw, PJS hpung ni yak yak hkak hkak hte ginsum jahkrat let nga nga ai hpe mu lu ai re.

Mani Myitkyina e PJS ni hpe shaga nna shi laika sanglang hpawng galaw ai hta ‘mungshawa ni hte asuya magam dap ni pawng nna galaw ai kani nanghpam pat jasan masing hpe n pat hkum ai’ nga nna pyada dap hte Myen hpyendap Dingdung Daw Daju (M.P.Hk) na lit nga hpyendu ni tsun wa sai re.

“PJS hpung hte kani yi madu ni lapran, gasat gala manghkang n byin ai hte ngwi ngwi pyaw pyaw hte pat jasan bungli galaw lu na matu mungdaw asuya, pyada dap hte hpyendap, shanhte yawng jawm shakut nga ai” nga M.P.Hk na Du Up Win Myo Aung tsun wa ai re.

Myen asuya uphkang ai kata, Masat 1003 Jarit Sin Dap BGF hte pyitusit n’gawn hpyen uphkang ai ginra hta lai wa ai, N.W.T/ N.A.Hp hpyendap asuya hte ya Gumsan Magam Slg. Ting Tsing a asuya ladaw du hkra, kani hpe wanglu wanglang hkai nga ai re.

Shaning shagu Myen asuya hpyendap hte pyada ni gaw Kambaiti ginra de ‘pat jasan mying’ hte lung wa nhtawm kani n shamyit ai sha, gumhpraw mahtang hta sha nga ai re.

Maga mi de Wunpawng Mungdan Shanglawt Hpung KIO hku nna mung laja lana kani pat jasan masing hpe shaning shagu galaw nga ai raitim, asuya uphkang ginra hta n lu galaw ai re.

Ndai zawn re ai masa kata, Jinghpaw mungdaw kata kani yi, kani nanghpam ni laning hte laning grau grau law wa ai majaw, seng ang ai asuya hte KIO hpe hkrai n kam ai sha, nawku hpung ni hte mungshawa ni 2014 kaw nna pat jasan bungli hpe n-gun dat galaw wa ai re.

Posted in: