Tuesday, February 23, 2016

Pat Jasan hpung ni Kambaiti de bai rawt


Feb 23, 2016 Nhtoi bat mi tup Washawnf Gate hta hkum pat tawn ai Pat Jasan hpung ni Kambaiti de matut rawt lung nga yang.

Myen asuya kaw nna bat mi tup pat hkum da sai mungshawa Pat Jasan hpung PJS gaw, Washawng gate Chipwi-Sadung lambraw kaw nna Kambaiti de dai ni Myen mung aten hkying 2 hta bai rawt lung wa sai re.

Hkristan nawku hpung shagu de na hpung woi ni akyu hpyi shaman ya let, kani yi eka hkying kahtap nga ai Kambaiti ginra de PJS n-gun 4,000 daram rawt lung nga sai re. Shanhte hpe madi shadaw ai shawa n-gun hkying kaba mung hkan sa lawm nga ai re.

Ndai zawn mung shawa ningtung ningba n-gun hte, PJS hpung ni pat jasan palawng n hpun ai, dawnghkawn n lang ai sha, asuya uphkang npu, Jarit Sin Dap (BGF) uphkang ginra kani sun de rawt lung wa ai re.

Kambaiti kani sun hte ya pru hpang wa ai Washawng Gate lapran Myen asuya hte BGF gate 5 hta n yawm nga ai re.

Mungdan asuya tara shang ahkang jaw ai lam n nga shi tim, shanhte ‘garum la na nga’ tsun tawn ai lam PJS ningbaw ning KNG Jinghpaw Shiga Dap de tsun ai re.


0 comments:

Post a Comment