Panglong na hpang ai Munghpawm kanang ta? Munghpawm Myen Mungdan hpe gaw de ai daini February 12 hta 69 ning hpring sai re.
Federal hkrang amyusha maren mara ahkaw ahkang hpe ningpawt nna, Myen ningbaw Bogyoke Awng San gaw Sam, Jinghpaw hte Hkang amyusha ningbaw ni hte Panglong Ga Sadi hpe 1947 ning February 12 hta myit hkrum ta masat htu ai re.
Panglong Ga Sadi hte maren 1948 ning hta Inglik npu Myen mung shanglawt lu sai. Raitim mungdan asuya hpaw shabawn hkrang snr gawda ai tara hta Panglong Ga Sadi hte maren tup hkrak n ka shalawm, n sa wa ai majaw mungdan shanglawt lu ai hte dinghku majan pru wa sai.
Myen ginjaw asuya langai hpang langai galai nna mungdan a gawda ai tara hte dawnghkawn hpe (3) lang galai ai raitim Panglong Ga Sadi hpe ya ten du hkra nyet nga dingyang naw re.
Democracy galai shai asuya nga nna 2011 kaw nna ndai ten du hkra uphkang ai Gumsan Magam Slg. Ting Tsing asuya gaw federal democracy hpe ‘masa hku’ hkap la ai, ngu ai madang hku sha tsun shapraw tawn ai re.
Raitim, shawa a madi shadaw me n-gun hte 2015 ra lata poi dang ai, Slg.jan Aung San Suu Kyi a NLD pati gaw du na March shata kaw nna asuya tai wa sana re. Teng teng gaw, Slg.jan Suu Kyi hta kawa Awng San, Myen ningbaw langai hku nna myit hkrum da ai Panglong Ga Sadi hpe shi hkrang shapraw na matu labau jaw ai lit nga ai re.
Lama dai hku n rai nna, Aung San Suu Kyi, shi a asuya mung shawng de na asuya ni hte maren sha Panglong Ga Sadi hpe matu nyet ai rai yang, munghpawm mung n nga sai re.
0 comments:
Post a Comment