BGF dap ni Pat Jasan hpe gap gasat, 3 hkala hkrum

 

Jarit Sin Dap, BGF dap Myitkyina e hkap hkalum nga yang, 2010

 

Asuya Jarit Sin Dap, BGF kaw nna, Kambaiti de lung wa ai laknak n lang ai Pat Jasan hpung hpe dai hpawt hkap gap ai hta, n law htum marai 3 hkala hkrum ai lam Pat Jasan ningbaw ni tsun ai.

PJS hpung ni gaw Shingchyai BGF dap lai, Wut Maw mare makau de du bang wa ai ten hkying 9 daram hta sinat laknak bawm ni hte hkap gasat hkrum ai re lam PJS ningbaw ni Jinghpaw Shiga Dap KNG de shateng tsun ai.

Gasat hkrum ai hte PJS hpung hpe shimlam jaw hkan nang ai Mungdaw asuya pyada ni hprawng yen mat sai lam PJS ningbaw ni kahtap tsun ai re.

Ya ten BGF hpyenla ni gaw Pat Jasan masha nkau hpe wang da ai rai nna, shanhte a lusha jarik hte arung arai nkau hpe mung mya la ai lam, nat kau ai lam galaw nga ai hpe PJS ningbaw ni tsun wa ai.

Salang Zahkung Ting Ying woi awn ai NDA-K, ya asuya Jarit Sin Dap, BGF uphkang ginra, kani yi nga ai shara de Pa Jasan hpung ni shang wa ai ten shawng ningnan lang sinat laknak ni hte gap gasat hkrum ai re.

Dai Pat Jasan hpung gaw February 23 ya shani hta bat mi tup pat da hkrum ai Washawng gate kaw nna, mungshawa mun mi jan hkan sa ai hte Kambaiti de lung wa ai re. Bai nna, nawku hpung woi nkau mung ya ten du hkra PJS hpung hte rau masing hta hkang nang nga ai re.

Matut nna shiga hkum hkum tsup tsup hpe tang madun mat na re.

Posted in: