WFP garum ntum yawm mat ai majaw, hpyen yen ni myit tsang

Daini Feb 2, 2016, waimaw, Mungna IDP hpyenyen dabang e amyu shayi ni hte seng nna hkamja lam hpaji jaw hpawng galaw nga yang.

Mungkan Wunpawng Malu Masha Garum Ntum Hpung, WFP gaw Jinghpaw mungdaw hpyen yen garum gahtau shadang hpe Shaning Ningnan kaw nna shayawm hpang wa sai majaw IDP hpyen yen masha ni grai myit tsang nga ai lam chye lu ai.

World Food Program, WFP gaw hpyen yen ni hpe n gu, sha sau, jum hte kaga lusha garum ntum ni jaw nga ai kaw nna, de a malai gumhpraw hpe mahtang madang lahkawng ginhka nna garum taw nga sai re.

Hkrum hkrang daw hten ai ni hte ja gumhpraw tam na atsam n rawng ai masha langai hpe kyat 13,000 garum ai rai nna, asak 18 ning hpring sai n-gun ja ai ni hpe gaw marai langai kyat 9,000 garum jaw nga ai re.

Ndai lam a majaw Sama Ginwang Nam San, Dabak hte Manmaw lam mayan na hpyen yen ni shanu nga ai Myitkyina, Lekone Betlehem hpyen yen dabang a lithkam Slg. Kumbu Naw Ja gaw myit tsang ai lam ya na zawn tsun ai.

“World Food hku nna mung June shata du hkra gaw naw jaw na. Dai hpang gaw a ma n lu hkam sai nga tsun ai. Dai re majaw ya Ma gaw law, jawng lung ai ni hkrai gumhpraw tam ai ni gaw n nga re ai majaw anhte camp ting yawng jawm gahpra hkrit taw ga ai”.

Bai nna Waimaw, Mungna IDP hpyen yen dabang kaw na Jan. Marip Hkin Nau mung ya na zawn tsun ai.

“Lani mi nchyang chyang sha hkawn yang mung Kyat 3,500 ram sha lu ai. Dai mung kalang marang sha re. Nta masha gaw law, n-gu manu gaw hpu re majaw myit yu nna, grai tsang nga ga ai”.

KIO hte Myen asuya gaw Mungdan Ting Gap Hkat Jahkring Ga Sadi (NCA) sen n htu shi ai majaw hpyen yen ni hku nna tinang nta buga de nhtang wa na n mai byin ai hta sha n ga, galaw lu galaw sha na shara shagu hta mung shimlam n nga ai majaw shawnglam hpe myit tsang nga ai lam hpyen yen masha ni tsun nga ma ai re.

Myen asuya hte KIO majan bai hpang ai mali ning jan sai ten, IDP hpyen yen ni WFP a malu masha garum ntum hta shamyet shanat ai hpe shayawm shangun mayu ai hte hpyen yen ni tinang ra ai malu masha lata mari sha lu na matu yaw shada ai nga WFP tsun ai re.

WFP gaw Jinghpaw mungdaw kata Myen asuya uphkang ginra, hpyen yen dabang (104), hpyen yen 38,000 hpe 2011 kaw nna malu masha garum ntum jaw nga ai re. Ya na zawn malu masha a malai ja gumhpraw galai garum ai shawng na ningdaw hpe dabang 75, hpyen yen 28,500 hta galaw na re lam tsun tawn ai re.

Posted in: