Amerikan Hkalup Ginjaw sara ni Waimaw Pat Jasan hpung hpe sa n-gun jaw

Par Jasan ni hpe ndai zawn ABC sara kaba langai kaw nna akyu hpyi shaman ya nga

Amerikan Hkalup Hpung Ginjaw (ABC) sara ni daini Waimaw ginra pawng hpawm Pat Jasan hpyen hpung ni hpe Waimaw mare hta sa du n-gun jaw sai re.

Shanhte gaw Waimaw Ginwang Hkalup Sasana Wang hta gan hkring nga ai Pat Jasan hpung ni hpe sa hkrum nna n-gun jaw, akyu hpyi ya ai lam ni galaw ai re.

Daini hkrum shaga ai shaloi, ya ten nawku-hpung ni woi awn galaw ai ndai kani nanghpam pat jasan masing hpe ABC gaw latsa shadaw hpring hkra n-gun jaw madi shadaw ai nga tsun wa ai lam, hkrumzup hpawng de shanglawm ai Jinghpaw Wunpawng Hkalup Hpung Ginjaw (KBC) amu madu Rev. Dr. Hkalam Samsun tsun ai.

ABC, Amerikan Hkalup Hpung Ginjaw sara ni gaw KBC hte sa hkrum na matu February praw 8 Bat Langai Ya shani Myitkyina de du wa ai re.

Lai sai ten Myen asuya pat hkum ai majaw, shaning 50 daram matut di mat ai ABC hte KBC lapran maning 2015 kaw nna bai matut mahkai lu ai re. Rai yang, ndai lang hte 2 lang hku nna, Jinghpaw nawku hpung ni woi awn ai hte Shaning Ningnan kaw nna labu pan kani yi dan shamyit masing n-gun dat galaw nga ai ten, ABC sara ni ya na zawn KBC hte sa hkrum shaga ai lam re.

Posted in: