Monday, February 15, 2016

Asuya-ginra kani yi shamyit na shawa n-gun jin jin rai

Waimaw du nga ai Pat Jasan Hpung

Mungshawa n-gun kaba hte Kambaiti asuya uphkang ginra na kani yi hkyen shamyit na masing hpe ndai bat hta bai hpang sana re lam Jinghpaw Wunpawng Hkalup Hpung Ginjaw KBC gaw lai wa sai February 13 hta ndau shabra dat sai re.

Myitkyina hkridun Dingdung Daju (M.P.HK) ahkang n jaw ai kata, Jinghpaw nawku hpung ni woi awn ai Pat Jasan Hpung n-gun 4,000 ram gaw Kambaiti ginra de rawt na jin jin rai nga sai lam KBC ndau dat ai re.

Bai nna, hpung masha ni Pat Jasan Hpung a matu lani mi alak mi akyu hpyi ya na matu hte ja gumhpraw hku nna mung madi shadaw shanglawm na matu KBC lajin ai re.

Nawku hpung ni woi awn ai PJS hpung ni gaw Lahta Sam mung hte Jinghpaw mungdaw kata, maning kaw nna ya ten du hkra, kani sun eka 10,000 mi jan hkyen shatsai kau lu sai raitim, ya naw hkyen ra ai kani sun eka mun hku naw nga ai lam tsun ai re.

Lai wa sai bat mi jan hta n-gun 200 jan PJS hpung langai gaw Kambaiti, Maw Si Tung ginra de shawng n’nan du shang wa sai. Raitim kani yi madu ni matut manoi ninghkap ai hkrum nna, dai hpe hkan nang ai asuya shimlam dap ni n lu shazim ai majaw February 5 hta bai pru mat ai re.

Nepyidaw asuya de sadi dung ai New Democracy Army Kachin (NDA-K), ya Jarit Din Dap (BGF) hte Pyitusit ginra, Myitkyina Sinpraw hkran Kambaiti ginra gaw Jinghpaw mungdaw kata kani law dik hkai ai shara rai nga ai.

Asuya shimlam n jaw ai kata, Pat Jasan Hpung ni Kambaiti de kalang bai lung wa yang, kani yi madu ni a mi na hta grau ninghkap wa na masa nga tim masing hpe matut galaw na re lam, KBC ndau dat ai rai nga ai.


0 comments:

Post a Comment