Thursday, July 7, 2011

Myen a laika KIO Ginjaw de WMR sa jaw

Myen a laika langai hpe Wunpawng Amyusha Mungbawng Rapdaw (WMR) kaw nna KIO Ginjaw Laiza de July praw 7, dai ni bat hpang mali ya shani sa jaw sai re.

KIO ginjaw Laiza.


Jinghpaw mungdaw Myen asuya a Shimlam hte Ga Jarit hte seng ai lithkam salang Lt-Col Than Aung a laika hpe WMR Ningbaw Tsumhpawng Sinwa Naw hte amumadu Slg. Labang Gam Awng yan sa jaw ai re lam, Laiza na KNG Jinghpaw Shiga Dap shi htawn tsun ai.

KIO maga mung laika langai hpe Myitkyina daju Myen asuya Dingdung Daw Daju (Ma-Pa-Hka) de WMR salang yan hku nna, shalai dat na re lam chye lu ai.



Ndai uhpung lahkawng htinglet hkat ai laika hte seng nna kata lam n chye lu shi ai.

June praw 9 Myen-Shanglawt gap hkat hpang wa ai hpang, “simsa lam gabaw” hte Myen gaw Myitkyina WMR salang ni hpe Laiza de ya lang hte 3 lang shangun dat ai lam re.

June 17, shawng n’nan lang hkrum hkat ai shaloi WMR salang ni gaw, “Myen hpyendap maga gap hkat jahkring sai” ngu ai Myen asuya a ga hpe Laiza de sa tsun nna, KIA mung gap hkat jahkring na matu sa jahkrup wa sai re.

Myen asuya a “kam ging ai gap hkat jahkring sakse” madun lu jang she, “tinang shawnglam KIA dap ni hpe gap hkat jahkring matsun na re” nga nna, KIO bai htang shana tawn ai lam, N/T Ninggawn Amumadu Kumhtat La Nan tsun ai.

Dai hpang June 30 Lajayang e lahkawng lang hkrum sai hte, KIA ginjaw gaw tinang shawnglam dap ni de Myen hpe sa gap gasat ai lam, mahkrai bawm kapaw di ai lam hte Myen kata de bawm sa kapaw ai lam ni gan jahkring na matu, matsun dat sai re.

Ndai KIA a shawnglam matsun a majaw, “KIO gaw Myen a simsa lam hkap la wa na kun?” ngu nna, dapshawa mungshawa gaw myit tsang nga sai re.

Myen-KIO Lajayang hkrum shaga ngut ai hpang, laklak lailai gap hkat lam zim mat ai gaw, dai ni July praw 7, bat hpang mali ya du hkra rai nga ai.

0 comments:

Post a Comment