Myen asuya dap a ma ja laknak kaba gap bun ai majaw Wunpawng Mungdan Shanglawt Hpyen Dap (KIA) Hpyen Du Jawnma marai 23 si nna sharin sara ni hte hpawn jawngma yawng marai 20 hkala hkrum mat ai Myen asuya dap a sat lawat ntsa aja awa ninghkap ai lam November 20 ya shani KIO kawn tsun dat ai.
“Ning re mabyin masa lam gaw maga mi simsa lam mahkrun de sat sa nga ten hpyen masa hpe shayawm lu hkra shakut nga tim ndai zawn gap ai lam gaw KIO Hpyen Du Shalat Jawng hpe yaw shada lam nga nga hte gap gasat ai lam mabyin a ntsa anhte KIO ginjaw hku na gaw manu mana jahpyak ai” nga Slg. Lah Nan tsun ai.
November 19 ya shani Hka Ya Bum kaw dung ai Myen asuya dap Hk.M.Y Masat (389) kawn laknak kaba gap bun ai lam a majaw si mat wa sai Hpyen Du Jawngma marai 23 a moi mang hpe daini jahpawt daw hkying 8:00 ten e hpyen hprim hkrak makoi mayang dat ya sai lam Slg. Lah Nan tsun ai.
Daini November 20 ya shani e KIO gaw dingyang galaw nga ai magam bungli yi-ngam ni hpe jahkring da ai lam, amyu sha dawnghkawn hpe kaang hkup sha shalun da ai lam, makam masham nawku hpung shagu mung akyu hpyi nawku dawjau ai lamang ni galaw ai lam hte hkrat sum mat wa sai share shagan ni a matu yawn hkyen ai lam masat dingsat galaw mat ai nga matut tsun ai.
Hpyen masa yawm wa lu hkra shakut nga ten Myen hpyen dap kawn laknak kaba hte KIA a Hpyen Du Shalat Jawng hpe yaw shada lam nga nga hte gap bun ai lam hpe KIO Ginjaw Komiti kawn aja awa ninghkap ai lam ndau laika hta tsun da ai.
KIO gaw November 20 ya shani na ninghtoi hte Munghpawm Simsa Lam Hkrang Shapraw Komiti (UPWC) Ningbaw Slg. Awng Min hpang de laika pa mi shagun dat sai lam mung tsun ai.
KIO a simsa lam hpung ningbaw Slg. Sumlut Gam a sen hte shagun dat ai laika hpe Slg. Awng Min hkap la lu sai nga chye lu ai raitim laika hta ganing re ka da ai hpe atsawm n chye lu ai lam, simsa lam hkrum shaga bawngban ai lam matut galaw sa mat na re lam Myanmar Peace Center (MPC) kawn Slg. La Mawng Shwi tsun ai.
“Anhte manghkang hparan ai shaloi ya na zawn myit n pyaw hpa mabyin masa ni hkrum katup wa chye ai. Rai timung dai ni hpe shayawm kau nna hkrum shaga bawngban na lam gamung dup mahtai tam hpawng hta mahtai tam la nhtawm lu ai mahtai hpe jawm hkrang shapraw wa na matu ahkyak na re ngu shadu ai. Bawngban hpawng zang ayai mat na gaw n shadu ai” nga shi kawn tsun ai.
KIO kawn hkawt amyu sha laknak hpai rawt malan uhpung uhpawng ni gaw bawngban mahtai tam ai ladat hte maren matut galaw na rai nna simsa lam hkrum shaga bawngban lam hpe jahten kau na matu myit jasat n rawng ai lam Slg. Lah Nan kawn tsun ai.
“KIO hte amyu sha laknak hpai rawt malan uhpung uhpawng ni yawng a jat jasa gaw hkrum shaga bawngban nhtawm mahtai tam ai ladat re. Ndai ladat hku anhte ni sa mayu ai. Ndai zawn sa mayu ai myit jasat nga tim Myen asuya hpyen dap ni kanawng lung wa nga dingyang naw re. Mani na dai mabyin langai hte sha gaw dai hkrum shaga bawngban hpawng masing hpe jahten kau na matu myit jasat gaw n rawng ai” nga matut tsun ai.
UPWC hte NCCT ni mungdan ting gap hkat jahkring lam ndai shata htum maga snr December praw de hkrum shaga bawngban na matu masing nga ai raitim ya na zawn KIA ntsa gap gasat wa ai lam nga wa ai majaw bawngban lam sit mat chye ai nga NCCT Ningbaw Slg. Nai Hkan Ta tsun ai.
“Anhte gasat gala lam hpe shayawm na matu komiti ni hpaw rai nna galaw nga ai. Anhte ni mung NCCT hku nna bawngban nga ai ladaw hta ya na zawn hpyen masa shagreng jat wa ai nga yang ndai gaw mungdan ting madang gap hkat jahkring lam hte simsa lam hpe n ra sharawng ai jasat kun. Jahten ai sat lawat hku wa ang ai ngu maram mai ai. Ndai hpe mungshawa ni hku nna mung sawn yu shara nga ai” nga shi kawn tsun ai.
Ndai mabyin gaw KIO ginjaw makau Myen asuya dap dabang ni makau kau hku sha jung da nna laknak kaba ni grai shadun da nhtawm manang ni a dap de jahte tam mayu ai jasat hte gap ai lam re ngu shadu ai lam, Mungdan Ting Madang Gap Hkat Jahkring Bawngban Jahkrup Hpung (NCCT) hte UPWC ni simsa lam magam yi-ngam mahkun masa lam awngdang wa lu hkra KIO ginjaw makau yang na Hka Ya Bum bum marawn kawn laknak kaba ni dawm kau na matu hte dai dap dabang ni hpe mung dawm kau na matu hpyi shawn da ai.
Daini majan bai kahtap byin ai lam nga/n nga shiga rai n lu shi ai raitim Myen asuya dap ni gaw Laiza ginjaw ginra mayan lakna kaba ni hte hpawn hpyen n-gun tsawmra mi jahting da nga ding yang naw re nga shi kawn tsun ai.
0 comments:
Post a Comment