 |
| Lai hprang masha ni kaw gumhpraw hta sha ai Lidu Lam, Yuzana company shagyit |
Jinghpaw Mungdaw Hugawng Pa, Lidu Lam mayang Yuzana Company pat hkum da ai yi sa lam dingsa hpe Wa Ra Zup mare na yi sun hkauna galaw masha ni dangdi dangdep ai hku galaw sha nga ai yi sa lam loi na matu kalang bai gram lajang da ai hta company kawn lam hpe November 14 ya shani jahten kau ya ai lam chye lu ai.
Wa Ra Zup mare yi sun hkauna masha ni gaw Lidu Lam kaba hku dingyang sa yang magyi magaw law nhtawm tsan ai hta sha n ga Yuzana Company a shagyit hta ahkun hkanse yawm dik kyat 3,000 bang ra ai majaw mam mu sha aten htaw wa htawsa loi hkra November 11 ya shani mare kawn hkauna de sa ai lam deng 3 jan hta lam byeng da ai hpe company magam gun ni kawn jahten kau ya ai lam re nga Wa Ra Zup yi sun masha ni KNG Jinghpaw Shiga Dap de tsun ai.
Hpa lachyum hte ndai zawn jahten kau ya ai hpe n chye lu ai raitim “shanhte pat da ai lam hpe anhte kalang bai hpaw kau dat yang shanhte a shagyit kaw gumhpraw n lu hta sha sana tsang ai majaw ya na zawn sa galaw dat ai mai byin ai” nga ginra buga masha Slg. Lagau Gun KNG Jinghpaw Shiga Dap de tsun ai.
Lai wa sai shaning ni hta Wa Ra Zup yi sun masha ni hkauna de sa ten deng 10 jan ai hkrun-lam rai nna lam lahpran hkan mung shagyit lai gumhpraw galoi mung bang ra ai majaw mare salang ni, mare uphkang du ni hpe ahkang hpyi nhtawm gram lajang kau dat ai re lam Wa Ra Zup yi sun masha ni tsun ai.
Yi sun masha ni gaw shanhte byeng da ai lam hpe htu awun kau htawn lahkrik lahkrawk di da ya ai majaw mam ni htaw wa na matu n mai byin sai lam, htawla-gyi, nga-leng ni pyi lai di n mai mat nna lagaw hku sha sa mai mat ai majaw company hpe grai n ju byin nga ma ai.
Shingrai jahten lawm ai ni hta Yuzana Company kawn bungli masha ni rai nga ai Slg. Myin Ting, Slg. Win Swi, Slg. Zaw Myai Lin ni gaw santeng, shanghkawp ni hte pe 3/4 htu nhtawm jahten kau ya ai lam re nga myi chyaw mu ai ginra buga masha ni tsun ai.
Dai zawn jahten taw nga ai majaw ginra buga masha ni kawn sa pat hkum yu ai aten seng ang ai company magam gun ni kawn “anhte marai mi hpe lani mi nchyang shabrai kyat 5,000 jaw nna jahten shangun ai re. Yuzana Company shagyit lit hkam Slg. Mya Chyaw shangun dat ai she re” nga nna sha tsun wa nhtawm n lu pat hkum dat ai lam yi sun masha ni tsun ai.
Ginra buga masha ni yi sun hkauna sa galaw ai lam hta mayak mahkak law ai majaw dai zawn gram lajang da ai hpe company maga kawn jahten kau ya ai lam a ntsa kahtap nna bai mai lai hkra gram lajang sa mat wa na re lam hte company hpe mung n-gun madun hpyi shawn mat na re nga nna mung tsun nga ma ai.
Yuzana Company gaw Jinghpaw Mungdaw Danai ginwang Hugawng Pa ginra de 2006 ning kawn du shang wa nhtawm pa layang lamu ga danpa mayan chyauman buga masha ni a myit-ra lam n lawm ai sha lamu ga ni hpe zing madu la ai lam a marang daini du hkra chyauman buga masha ni hte company lapran dingyang naw chya hkat taw nga ai zawn Nai Kadung ni hkai shatut ai bungli masing kaba a gung tsi ntsin ni a majaw yi sun masha ni a hkamja lam hta sha n ga, Dumsu, Wuloi dusat dumyeng ni sum machyi ai lam hpe mana sha taw nga dingyang re lam chye lu ai.
0 comments:
Post a Comment