Tuesday, November 11, 2014

Manwin e kani nanghpam pat jasan shamu shamawt lam galaw



Jinghpaw Mungdaw Manmaw ginwang Manwin mare hta nawku hpung Nanghpam Tsi Mawan Pat Jasan Komiti ni gaw nanghpam tsi mawan hkoi san lam a matu ginra buga masha ni hpe hpaji jaw laika pa ni gam garan nhtawm sadi jaw pyendau ni sharawt ai shamu shamawt masing ni galaw ai lam chye lu ai.

Manwin snr Manwin Ji mare hta daini November 11 ya jahpawt hkying 10:00 kawn shana de hkying 5:00 du hkra shamu shamawt ai lam rai nna mare kawn deng 40 gang ai kahtawng ningchyawng ni hta November praw 9 ya shani kawn galaw hpang nga sai lam Manwin Buga Hkalup Nawku Hpung a Nanghpam Tsi Mawan Pat Jasan Komiti kawn hpaawn Sr. Lahpai Zau Lat Jinghpaw Shiga Dap de tsun ai.

“Nanghpam tsi mawan gaw Jinghpaw Wunpawng amyu sha yawng a hpyen madung re ngu ai hpe sadi jaw mayu ai, bai nna ndai shamu shamawt lam hta gau ngwi ngwi yawng hte pawng nna galaw sa mat wa na. Yaw shada ai lam gaw mungshawa ni a shanglawm ai lam ni jasat jasa lu la wa hkra mung galaw taw ai re” nga tsun ai.

Nanghpam tsi mawan chyam bra ai lam ni hkoi san wa lu na matu laika pa ni hta “nanghpam tsi mawan gaw amyu sha yawng a madung ahkyak dik hpyen majing rai nga ai” ngu nhtawm, Chyum daw ni hte mung sadi jaw ka da ai lam galaw nna pyendau ni hta mung “nanghpam tsi mawan hpe jawm gasat kau ga” ngu ai ga si ni hpe Jinghpaw, Myen, Miwa, Sam lakai ni hte hpan 4 hku ka saleng sharawt mat ai re lam chye lu ai.

Manwin ginra Nanghpam Tsi Mawan Pat Jasan Komiti kawn uhpung 6 garan nhtawm Manwin mare hta shara 13 hte laga kahtawng ni hkan shara 34 ni hta mung shing shing rai nanghpam tsi mawan pat jasan masing shamu shamawt lam ni galaw mat wa ai nga tsun ai.

Manwin ginra hta nanghpam tsi mawan dut mari ai ni hte lu sha jai lang ai masha jahpan 200 hkawt lu da nhtawm dai ni hpe sadi jaw ai lam ni galaw na re lam hte hkam la ai lam n nga yang ahkyak la dam jaw ai lam ni galaw mat wa na re nga Komiti kawn tsun ai.

Manwin Ji mare hta chyauman kahtawng masha ni hte hpawn hpyen yen tsin-yam dabang mung nga nhtawm masha n-gun 12,000 jan nga shajang ai lam chye lu ai.

Dai zawn Jinghpaw Mungdaw na hkristan nawku hpung ni jawm woi awn let nanghpam tsi mawan pat jasan lam hpe ginra shagu amyu sha bawsang roi sai baw-pa n ginhka sadi jaw shamu shamawt nga ai lam ntsa ginra buga masha ni myit dik n-gun lu ai lam, nanghpam tsi mawan hkoi san lam hpe matut hkrang shapraw sa mat wa na matu myit mada ai lam ginra buga masha ni tsun ai.

Daining shawng daw na shata ni kawn nawku hpung ni jawm hpaw shabawn da ai Nanghpam Tsi Mawan Pat Jasan Hpung ni gaw madung Myitkyina, Hpakan, Manmaw ginra ni hta shamu shamawt ai lam ni galaw nhtawm sadi jaw ahkyak la ai lam ni mung galaw mat ai rai mali ai.


0 comments:

Post a Comment