Thursday, October 17, 2013

Asuya dap Hk.M.Y (507) shamu shamawt ai hpe KIA bawm kapaw bun


Myen asuya dap Hk.M.Y 507 hte KIA Dap 27 lapran majan byin shara


Wunpawng Mungdan Shanglawt Hpyendap (KIA) Dapba (3) Dapdung (28) ginra de asuya dap Ts.K.Hk Masat (16) npu Hk.M.Y Masat (507) hpyen n-gun (100) jan hte shamu shamawt wa ai majaw Oct. 16 bat Masum Ya shani jahpawt KIA maga kawn bawm hte lahkawng lang kapaw bun dat ai lam chye lu ai.

Dai asuya dap hpe Nam Hkam myu-ne KIA Dung (27) ginra Hu Hin hta kalang, Man Sawn hta kalang bawm hte gasat kapaw bun ai majaw asuya dap ni Nam Hkam maga de bai htingnut mat wa ai lam chye lu ai.

“Lahta maga de lung wa yang manghkang byin na re ngu myit su salang ni tsun nga ai kaw lung wa ai majaw KIA maga kawn (2) lang gap dat ai hta asuya dap htingnut mat ai” nga KIO ginjaw Hpyen Yen Lakawn Lanawn Hpung ningbaw Salang Kaba Doi Pyi Sa KNG Jinghpaw Shiga Dap de tsun shagrin wa ai.

Dai zawn byin ai hpang kawn Mabing myu-ne KIA Dapba (3) Dapdung (12), Je U makau Nam Hawm asuya dap ni shamu shamawt nga ai majaw mare masha ni hkrit tsang nga nna shim ai shara de hprawng yen mat ai lam chye lu ai.

Dai kahtawng hta htinggaw (50) jan nga ai Shan-Bama mare rai nna October (15) ya shani hta lahkawng maga na dap ni gap gasat nga ten asuya dap gaw mare de gap bang wa ai majaw hprawng yen mat ai re lam chye lu ai.

Hkrum saga bawngban hpawng maga mi de asuya hpyen n-gun jat bang nga dingyang re majaw lahkawng maga na dap ni ten n tam chya hkat taw ai masa mung re lam KIA maga kawn tsun ai.

Asuya hte KIO lapran ya yang na hkrum shaga hpawng hta ginra shimlam masa a marang htawt sit hprawng yen mat ai mungshawa ni tinang nga ai shara de bai wa lu na lahkawng maga na dap kawn hpyen masa shayawm lam hte majan matut n byin na lam myit hkrum da ai raitim hpyen masa shuk nga ai majaw matut nna hprawng yen nga dingyang rai nga ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group


0 comments:

Post a Comment