 | ||||
| 2011 ning June shata majan byin wa ten Laiza de hprawng du wa ai hpyenyen ni. |
Jinghpaw mungdaw Manmaw ginwang Manje myu-ne Mung Ding Pa mare hta majan byin ai ten Nawku Jawng wang hta rim rawng hkrum ai kahtawng masha marai (500) jan gaw Manmaw Hpan Hka Kung tsin-yam dabang de hprawng yen nga sai lam mare masha ni kawn chye lu ai.
Mung Ding Pa kahtawng masha ni gaw Myen asuya dap ni makau mayan de dap htingnut nga ten KIO maga kawn shimlam la ya nhtawm hprawng lawt lu ai re lam Mung Ding Pa mare masha Sr. Ze Htawng kawn KNG Jinghpaw Shiga Dap de tsun ai.
“Shanhte gaw anhte nawku jawng kaw sha n nga ai ngam ai shara shagu hta asuya hpyenla ni hkrai re. Mare lawu maga mung hpring hkra re KIA hte asuya dap ni mung htep htep sha nga taw ai majaw nga n mai mat sai. Mare kaw nga na yak wa ai. Tsang ra ai. Dai majaw kahtawng ting hprawng le wa ai.”
Hprawng yen hkawm ai mare masha ni hta ma kaji ni, mahkum hte re ai ni, jawngma ni, sak kung lam n hkawm jin sai ni rai nna nam lam dawk hkawm ai hta marang htu da nna lam grai yak ai ten re majaw hkying hkum ni hta deng mi shadang hpi hkrun lam n lu sat ai lam chye lu ai.
Mung Ding Pa mare masha ni gaw mare kawn deng (5) gang ai Hkadan Pa hkau-na pa e lana mi yup nna Man Ta mare kaw du nga ai hta Manmaw Manje kawn mawdaw hte Man Ta kawn Hpan Hka Kung tsin-yam dabang de htaw sa dat ya na re lam chye lu ai.
Hpan Hka Kung hta Jinghpaw Wunpawng Hkalup Hkristan dum n’ta (28) nga ai mare rai nna dabang hta tsin-yam masha marai (219) nga ai hta tsin-yam masha kahtap du wa na re majaw hkyen lajang nga dingyang raitim ra rawng ai lam naw nga ai hpe dai dabang lithkam Lahtaw Zau Bawk KNG Jinghpaw Shiga Dap de tsun ai.
“Ya yang du shang wa ai ni hpe ndai kaw da na. Nkau hpe gaw Manje kaw da na, Htoi San Hkalup nawku jawng hkan da na. Jawngma lawm ai dinghku hpe gaw ndai kaw hkring hkra ginsum gan gap nna laika sharin na matu galaw nga ai. Marai (150) daram nga lu hkra ngu sawn da ai.”
Tsin-yam masha ni a nga pra sak hkung lam a matu hka, wan, hpun ni garum na naw ra gadawn nga ai lam dabang kawn tsun ai.
Asuya hpyen hpung ni gaw ya yang Mung Ding Pa, Mahkaw Yang, Nam Hpu, Kawng Ja ni hta shamu shamawt nga dingyang re majaw mare kahtawng masha ni maling mala hte tsin-yam dabang ni de hprawng yen hkawm ra ai rai nga ai.
www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group
0 comments:
Post a Comment