Wang da kata na asuya dap shamu shamawt lam hpe KIA jaugawng kasat

Hpyen shaman nga ai KIA hpyen hpung.

Wunpawng Mungdan Shanlawt Hpyen Dap (KIA) Masat (3) Dap Ba, Dap Dung (12) ginra de asuya dap Ts.K.Hk Masat (21) npu Masat (3) zai ladat hpyen n-gun (100) jan, Gumra (50) jan hte garum lung wa ai hpyen hpung ni Saga Nam Hkum sa lam Awng Nan mare dingsa mayan hta October 29, bat Lahkawng Ya shani majan byin ai lam chye lu ai.

“Hpyen garum n-gun hpyenla (100) jan hte shawng gap hkat ai re. (28) ya shana hkying 9:00 pm du hkra gap hkat ai. (29) ya shana gaw hpyen garum sa tau ai ni hte laja lana gap hkat ai. Shanhte maga si hkala ai lam nga na re” nga KIA Dung (12) Dap Up Dkb. Labang Jawn Awng, KNG Jinghpaw Shiga Dap de tsun ai.

Dai zawn hpyen n-gun jat shamu shamawt wa ai asuya hpyen hpung hpe KIA Dung (12) ni wang da ai shara Saga Nam Hkum de rai n du yang na lam lapran hta mana yup tung KIA Dung (12) ni sumwup majan kahtap kasat ai re lam chye lu ai.

Dai asuya hpyen hpung ni gaw Nam Gau, Awng Nan hte Nam Ak hta hpyen n-gun (200) hkawt shara jahkrat da ai lam hpe chye lu ai.

October (22) ya shani kawn byin hpang wa ai majan gaw shani shagu kasat nga ai rai nna lahkawng maga na dap ni laknak kaji kaba jai lang kasat hkat ai hta lahkawng maga si hkala ai lam KIA Dung Up tsun ai.

Dai zawn lahkawng maga bawngban hpawng hta majan shayawm na matu hte mungshawa masha jai lang nga ai lam-maw kawn htingnut ya na jawm myit hkrum da ai lam a marang KIA hku na gaw htingnut da ya sai raitim, asuya dap mahtang kanaw lung shamu shamawt wa ai majaw majan kalang bai hpang wa ai re lam KIA maga kawn tsun ai.

“Majan ni byin ai majaw ndai bawngban hpawng kaw laga mi hkra machyi ai lam gaw n nga ai. Raitim, kaji kajaw gaw ahtu hkra ai le. Gap hkat n jahkring da ai majaw shanhte maga na shamu shamawt nga ten langai hte langai hkrum hkrat nna gap hkat ai re. Ndai zawn gap hkat ai lam hpe asuya maga na mung loi li sadi sahka ya yang manu ai. Masing nga nga hte nan galaw ai re ngu sha mu mada ai” nga PCG kawn Lamai Gum Ja, KNG Jinghpaw Shiga Dap de tsun ai.

Wunpawng Mungdan Shanglawt Hpung KIO Ginjaw Laiza Muklum hta Mungdan ting shadang gap hkat jahkring lam a matu shajin ai bawngban hpawng hta amyusha laknak hpai hpung shagu na n’tsa tsang salang ni hkrumra hpawng de du nga ten KIA Masat (3) Dap Ba ginra hta asuya dap hte shani shagu chya hkat gap hkat nga dingyang rai nga ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA