 |
| Du Kaba Sumlut Gun Maw, NCCT ningbaw malai hte KIA tau dap awn daju |
Asuya munghpawm simsa lam hkrang shapraw komiti UPWC hte amyusha rawt malan hpung ni a mungdan ting madang gap hkat jahkring bawngban jahkrup hpung NCCT yan kalang bai hkrum shaga na matu tau hkyen lajang ai zuphpawng hpe August praw 9 bat Kru Ya shani kawn Myen-Htai jarit shara mi hta galaw nga ma ai.
“Anhte Laiza zuphpawng hta amyusha rawt malan hpung ningbaw ningla ni a hpaji jaw ai lam ni hpe madung dat nna No. 2 nhprang hpe garam lajang sa wa na. Dai hte maren July 13 ya shani... anhte hpe nhtang shana da ai lam ni nga ai. Slg. Awng Min ni Myitkyina kaw sa nna anhte hpe lawnglam nkau bai jaw da ai lam nga ai. Ndai ga baw masum ntsa bawngban mat nhtawm No. 2 nhprang hpe gram shagreng ai lam galaw na” nga NCCT ningtau ningbaw Du kaba Sumlut Gun Maw tsun ai.
Du na August shata 12 ya du hkra mali ya tup galaw na NCCT zuphpawng hta July 25-29 ya du hkra galaw ai Laiza chyawm tari zuphpawng kawn amyu sha bawsang ningbaw ningla ni a machyan jaw ai lam hpe madung dat nhtawm Single Text No. 2 nhprang hta gram jat na lam, July 13 ya shani Myanmar Peace Center (MPC) kawn tang madun ai No.2 nhprang ntsa dinglun da ai lam hte August praw 3 ya shani asuya maga tang madun ai lawnglam dawshan ni hpe bawngban jahkrup mat na re lam Dkb Gun Maw tsun ai.
Lai wa sai August praw 3 ya shani Jinghpaw Mungdaw, Myitkyina ginwang hta Hkringmang Awng Min kawn tang madun wa ai lawnglam 5 daram kawn nkau dawshan ni hta amyusha laknak hpai hpung ni ra sharawng ai lam ni hte masa shai hkat nga ai majaw bai jahkrup la ra ai nga Shiga Dap ni hpe matut tsun ai.
“Masa hku na Federal ladat hpe tup hkrak bang mayu ai. Asuya mahtang Federal hpe shatang du hkra n bang mayu ai. Democracy hpe sha htawng madun mayu ai. Langai hta amyusha bawsang ni yawng gaw maren mara ahkaw ahkang nga ai. Dai majaw mungmasa ginrun woi awn komiti hpaw shabawn sa wa na lam hpe tang shawn ai. Asuya maga na mungmasa woi awn komiti hpaw nhtan sa wa na lam hpe teng sha myit hkrum ai lam n madun ai sha... maren mara ahkaw ahkang nga ai ngu ai ga-shan ni hpe ma.. ndai lam ni hpe matut jahkrup ra ai. Ndai masa lahkawng shai hkat taw ai” nga Dkb Gun Maw kawn tsun ai.
Ya na zawn myit hkrum manaw shai ai lam nga wa ai majaw mungdan ting shadang gap hkat jahkring ga shaka ka ai lam n zang ayai mat ai mat hkra, hkamla lam langai hpe jumtek mat na matu NCCT a daini hpawng hpang ai lamang hta dawdan ma ai nga Du kaba matut tsun ai.
“Anhte hkamla lam langai hpe jumtek lu na wa hkra dawdan ai lam langai gaw ndai anhte ka na mungdan ting gap hkat jahkring ga shaka ngu ai hta prai mat wa ai baw ga shaka hpan n re sha ngut kre hkra hkrang shapraw ya lu ai ga shaka hpan rai lu hkra, lahkawng maga hkamla yang mai ai ngu ai ningmu ntsa madung tawn nna dawdan ga ai” nga shi kawn Shihtawn ni hpe tsun ai.
Single Text no. 2 nhprang ntsa kalang bai jahkrup na matu Yangung myu simsa lam ginra nta hta hkrum shaga hkat na matu du na August 15-16 ya shani hta hkrum na lam NCCT kawn nhtoi masat da sai raitim, hpawt de August 10 ya shani kalang bai shagrin mat wa na re lam hpe mung matut tsun ai re.
Asuya maga bai tang madun wa ai lawnglam ni hpe kalang bai jahkrup la ra ai majaw simsa lam masing masa hpe yu reng gawn hkang na matu ginrun woi awn komiti hpaw shabawn na lam hte seng nna matut jahkrup la ra ai nga NCCT Ningtau Ningbaw Badu Koi Htu Win tsun ai.
“Federal ngu ai hpe bai jahkrup la ra ai. Gap hkat jahkring lam galaw nga ai hpang daw mungmasa jahta taw ai ladaw, mungmasa hku yu yang myit hkrum ai lam n lu shi ai aten, hpatwat (wa-hkrang) ladaw e amyu sha bawsang ni tsap nga ai lam ni hta ra sharawng ai masing masa ni n bung hkat ai” nga matut tsun ai.
Lai wa sai July shata 25-29 ya shani galaw ai Laiza chyawm tari zuphpawng hta gumrawng gumsa lam, tara rapra lam, madu uphkang ahkang aya ni hpe hkamdaga jaw ai Federal Munghpawm hpaw shabawn gawgap sa wa na lam ni hta sha n ga, lawnglam 10 lawm ai ga shaka hpe mung masat jahkrat da lu sai lam rai mali ai.
0 comments:
Post a Comment