Friday, August 15, 2014

Hpakan lungseng maw bai hpaw ai shaloi gap hkat ai lam koi yen na, KIO hpe Myen jahkrup


KIA Dap 6 a shawnglam post langai, Hpakan

Hpakan lungseng maw bai hpaw wa ai shaloi, uhpung lahkawng dap lapran hkrum katut gap hkat ai lam ni n byin hkra koi yen na matu Myen asuya gaw Wunpawng Mungdan Shanglawt Hpung (KIO) hpe bawngban jahkrup wa sai re.

Uhpung lahkawng ginrun manghkang bawngban hparan komiti a August 12 bat Lahkawng Ya shani Jinghpaw mungdaw mare daju Myitkyina kaw galaw ai zuphpawng hta ndai lam hpe mungdaw asuya a lamu ga jarit hkringmang Du Kaba Tan Awng bawngban ai lam re.

Company ni a shimlam la ya ai Tatmadaw asuya dap gaw maw ginra hta hpyen hpung shamawt shamawt hte hkawm sa hkawm wa lam ni galaw ai shaloi KIA hte hkrum katut gap hkat lam ni n byin hkra koi yen hkat na matu tsun jahkrup ai re lam, dai zuphpawng madat lawm ai Myitkyina daju PCG (simsa lam akyu galaw hpung) Salang Lamai Gum Ja tsun ai.

Ndai zuphpawng du na mahka, Hpakan KIA Dap 6 ginra Kap Maw Hka hku Sabaw Maw (lung hkyeng Badi Maw) de asuya Dapnu Masat 66 hpyen hpung ni htu shang wa ai majaw August praw 8 hte 10 ya shani ni hta gasat poi ni byin wa sai re. Ya ten gap hkat ai lam matut n byin tim lahkawng maga dap ni n-gun jat tawn let shada yu sin hkat nga ai lam ginra buga masha ni tsun ai.

Badi Maw kaw gap hkat ai aten hta sha, Mung Nyang (Mu Nyin) ginwang Nawnglut ginra shara mi kaw mying n chye ai asuya dap hte KIA Dap 26 lapran aten kadun gap hkat ai lam byin mat sai re.

Asuya dap ni htu wa ai majaw Sabaw Maw kaw majan byin ai hte seng nna, “asuya hpyen hpung ni da sang yaw shada ai lam n nga ai sha shimlam la shamu shamawt hkawm ai kaw KIA hte hkrum katut gap hkat ai lam byin mat ai re nga” asuya gaw KIO hpe Myitkyina ginrun komiti zuphpawng hta sanglang dan ai lam, Slg. Lamai Gum Ja tsun ai.

Lai wa sai 2012 ning kaw nna Naypyidaw asuya gaw hpyendap Dapnu (tat-ma) langai hpe Hpakan lungseng maw ginra hte Myitkyina-Hpakan lam hta jahkrat tawn sai re. Ndai zawn hpyen n-gun kaba jahkrat tawn ai lahkawng ning a hpang lungseng maw bai hpaw ai lam mung re.

2011 ning June shata, KIO hte simsa lam hten mat nna majan n’nan bai byin ai hpang, lahkawng ning jan pat tawn ai Hpakan lungseng maw hpe September praw 1 ya shani hpaw na lam, Myen ginjaw asuya ndau dat ai re.

Ya ten company ni tinang a seng htu seng shap jak arung arai ni jahkrum chyatsup let hkyen lajang nga sai rai nna, company nkau rai yang lungseng htu hpang nga sai lam Hpakan ginra buga masha ni tsun ai.

KIO hte gap hkat jahkring ai lam rai n nga ten, asuya maga shada hkrum katut gap hkat ai lam koi yen na tsun jahkrup ai lam nga tim, lungseng maw bai hpaw wa na lam hte seng nna gaw KIO hte kaga mi n jahkrup ai lam chye lu ai.


0 comments:

Post a Comment