Hpakan lam asuya dap ni shimlam la na lam KIO hpe tsun

Hpakan lungseng maw shata mi kaw mu lu ai Myen hpyendap Dapnu (tat-ma) masat 66 hpyenla lahkawng.

Ndau tawn ai hte maren Hpakan lungseng maw hpe September praw 1, bat Langai Ya shani kawn bai hpaw sana re majaw Hpakan lam hpe asuya dap ni shimlam la na re lam hpe Wunpawng Mungdan Shanglawt Hpung (KIO) hpe shiga shana tawn sai rai nga ai.

Uhpung lahkawng ginrun Manghkang Hparan Masit Komiti salang ni August 12 ya shani Jinghpaw mungdaw mare daju Myitkyina kaw hkrum hkat ai shaloi, mawdaw lam a la-pai la-hkra deng 3 kawn deng 5 du hkra asuya dap ni shimlam la na re lam hpe tsun wa ai.

KIO maga na komiti malawm Du Kaba Nhpang Naw Bu ya na zawn sanglang wa ai re.

“Ya yang gaw grai shuk ai gaw.. hpa n nga ai. Ma ni na manghkang hparan ai kaw lawm ai gaw shanhte tsun ai dai Hpakan lam de e ya September shata kaw e ndai tara shang Company ni bai shang na rai sai re majaw, shanhte Myen ni hku na gaw ndai mawdaw lam a la-pai la-hkra de mai (deng) 3 hte mai (deng) 5 lapran.. jan ai gaw (lam, mahkrai) ni a matu shimlam la ai hku na shang hkawm mat wa na re nga ai majaw anhte hku na gaw n dawdan lu ai. Anhte htaw ginjaw de naw tang madun ya na ngu nna tsun tawn da ai langai nga ai.”

Ndai zawn shimlam la ai hta shada hkrum katut gap hkat lam ni n byin hkra koi yen hkat na matu mung KIO hpe asuya maga bawngban wa ai lam chye lu ai re. Ya ten du hkra dai lam ntsa KIO ginjaw mahtai rai n jaw ai lam chye lu ai.

Raitim Zai Ninggawn Matsun Du Dukaba Maran Zau Tawng woi awn ai KIO Manghkang Hparan Masit Komiti gaw August 14 ya shani Namti makau KIA Dung 11 de sa du nna asuya hte hpyen masa mung masa hkan shatup na myit hkrum da ai lam ni hpe sanglang dan wa sai lam, Du kaba Naw Bu tsun ai.

Posted in: SHIGA