Hpakan lam hta kani ninghkap ‘poster campaign’ galaw nga

Myitkyina a dingdung Jaw Rap nawku jawng langai kaw sharawt tawn ai KANI NANGHPAM ninghkap poster.

Jinghpaw mungdaw sinna Hpakan lam dingyang kani nanghpam ninghkap ai ndau laika shakap ai lamang ‘poster campaign’ hpe ginra buga masha ni galaw nga ai lam chye lu ai.

Kamai Ginwang Daw Pat Jasan Komiti woi awn ai hte Mogawng hte Hpakan lapran mare buga shagu hta pat jasan komiti lakying ni hpaw let poster sharawt ai lamang hpe August 18 ya shani galaw hpang wa nna du na September du hkra galaw na lam re.

Poster hpe Gauri, Hka San mare kawn Nam Ting, Gat Noi mare du hkra shakap mat na rai nna, yawng 60 re lam Kamai Ginwang Daw Pat Jasan Komiti salang langai tsun ai re.

Pe 6x4 kaba ai vinyl poster hta dai ning na Jinghpaw Wunpawng kani pat jasan bandung 3--- Kani nanghpam hpyen hpe Karai Kasang a chyalai n-gun hte gasat kau na, Kani nanghpam hpyen hpe ninggawn shawa n-gun gahkyin nna mung gasat kau na, hte 2014 ning gaw kani nanghpam bunghkup kau lu ai shaning rai lu na--- hpe Jinghpaw laika hte ka tawn ai lam chye lu ai.

Poster hpe nawku hpung shagu hte htunghking hte laili laika wang ni hta sharawt tawn ai re.

Myen asuya up ai Kamai ginwang daw kata kani hpraw, kani chyang hte yama tsi hkyep ni hpe wanglu wanglang dut shabra nga ai hta, kaba ai hku dut hpaga galaw masha marai 4 nga nna, ndai hta kani hpraw gaw Mung Nyang (Mu Nyin), Hupin hte Shahtu Zup (Danai) lam hku madung shang ai lam chye lu ai.

Dai re majaw kun dinghku shagu ngu na hta kani nanghpam lu sha ai manghkang nga ai lam chye lu ai.  Myitkyina daju Mungkan Tsidu Hpung (MDM) kawn Kamai de bat mi kalang sa nna kani htu tsi samyit n’nan wa sa da nhtawm lang ngut chyalu la mat ai lam ni mung galaw nga ai re.

Ya ten pat jasan komiti woi awn nna hkyi ya ni hpe dawn dabang masum de sa nga ai re. Dai gaw Myitkyina kaw na Jinghpaw Wunpawng Hkalup Hpung Ginjaw (KBC) hpaw ai Mungga Ninghtoi dabang, Tang Hpre Jau Ginwang na dabang hte Sara Nding Ah Ja woi awn ai Waimaw, Nawng Hkying dabang ni re.

Raitim kani ya nkau gaw ‘kani hpe lup wa kawng de nam de she wa lu sana, mare kaw n lu sai majaw mara n nga sai” nga nna dawn dabang sa na ningdang nga ma ai lam chye lu ai re.

Dai ning April 25 ya hpe Jinghpaw Wunpawng Kani Ninghkap Nhtoi hku masat dat ai hpang, bandung langai sha hte pat jasan bungli masing hpe Jinghpaw ginra ni hta lahkrip ra ra hte galaw nga ai re.

Posted in: SHIGA