Laiza amyusha laknak hpai hkrumra zuphpawng de uhpung shagu na dat kasa ni sa du

Laiza amyusha laknak hpai hpung zuphpawng

Jinghpaw mungdaw hte mungdan ting madang gap hkat jahkring bawngban hpawng a matu Wunpawng Mungdan Shanglawt Hpung (KIO) ginjaw Laiza Muklum hta galaw sa wa na ‘ Ethnic Armed Organizations Conference’ amyusha laknak hpai hpung hkrumra hpawng de seng ang ai ntsa tsang salang ni gaw October (28) ya shani kawn du magang sai rai nga ai.

October (30) ya kawn hpawng hpang na dai hkrumra hpawng de Amyusha Hpyen Masa Mungmasa Daphpawm (UNFC) kawn hpung masha ni dai hpawt hkying (12:00) daram hta shawng nnan Laiza Muklum de du magang sai lam rai nga ai.

Ya du nga ai amyu sha laknak hpai hpung ni gaw Karenni KNPP, Mun NMSP, Rahkai AL, Rahkai ANC, La Hu LDU, Wa WNO, Rahkai (Arakan Army),  Balawng TNLA hte Balawng PSLF, Amyusha Hpyen Masa Mungmasa Daphpawm (UNFC) kawn dat kasa ni marai (17) du nga ai lam chye lu ai.

Dai UNFC hpung ni hpe KIO kawn Nam San Yang du hkra sa tau la nna Munglai Hkyet makau hta KIA ginra na Hkang hpyenla ni, salang ni dawnghkawn lang kahkrem tsap let hkap tau la ai lam chye lu ai.

Dai amyusha ningbaw ni hpe Laiza buga masha ni kawn laknak hpai amyusha yawng a dawnghkawn lang nhtawm Laiza shang wa ai lam kawn madum sumpyi ni hte mawng rai hkap tau la ma ai.

Hta sha n ga, daini du shang wa ai UNFC n’tsa tsang salang ni hpe KIO Ningbaw Kaba hte rau Ningbaw Malai, KIO Makan dap shagu na myitsu salang ni, Hpyen dap maga na du salang ni shanglawm nna hkalum la ai lamang hpe mung Padang Gawknu hta e galaw sai lam chye lu ai.

Hkap tau la ai kaw na langai gaw “mung mare masha langai hku na myit grai kahpra ai. Ndai zawn Myen mung kaw shawng nnan lang galaw ai hkumra hpawng re majaw gara hku byin wa na ngu ai hpe sawn yu nna le. Ahkang jaw ai mungdan asuya hpe mung chyeju dum ai. Laiza Muklum kaw galaw na ahkang lu ai majaw buga masha langai hku na arawng la ai” nga tsun ai.

Hkumra hpawng de amyu sha laknak hpai hpung kawn marai (19) shanglawm nna October (30) ya kawn November praw (1) ya shani du hkra Laiza Muklum Padang Gawknu hta galaw sa mat na re lam chye lu ga ai.

Dai dat kasa salang ni gaw Myitkyina KIO Machyoi Hpung Rapdaw rung kawn kalang bai Laiza de hkrunlam sat sa wa ai rai nna Laiza mungshawa masha marai 1,000 daram hkap tau hkalum la ma ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA