Asuya manaw shiga ni hta federal hkap la ai lam n tsun

Aug. 15-17 UPWC hte NCCT zuphpawng galaw shara asuya a MPC rung, Yangung

Myen asuya n-gup shi laika ni hta “federal munghpawm hkap la sai lam” shiga tang madun ai lam rai n nga ai.

Asuya munghpawm simsa lam hkrang shapraw komiti (UPWC) hte amyusha rawt malan hpung ni a mungdang madang gap hkat jahkring bawngban hpung (NCCT) lapran August 15 kawn 17 ya du hkra asuya a Yangung Myanmar Peace Center (MPC) rung kaw galaw ai zuphpawng hte seng nna shiga ni hpe asuya Myanma-Alin hte Chye-Mung shi laika lahkawng hta August 16 kawn 19 ya du hkra mu lu ai re.

Raitim dai shiga ni hta “federal hkap la ai lam” hte seng nna shaleng da ai lam langai mung n lawm nga ai.

Ndai ten asuya n-gup n re ai Myen shiga dap ni rai nga ai BBC, VOA, RFA, DVB, Irrawaddy, Eleven shiga ni hta gaw “asuya federal munghpawm hkap la sai” ngu ai shiga ni hpe shiga gabaw dat nna tang madun wa sai rai nga ai.

August 17 ya UPWC hte NCCT a ginrun ndau hta mung “Naypyitaw asuya gaw federal munghpawm hpe hkap la sai lam” tara shang ndau ai lam n lawm ai.

Myen hpyendap gaw federal hpe n hkap la

Tatamadaw Myen hpyendap gaw amyusha rawt malan hpung hpyi ai federal munghpawm hpe hkap la na yak ai lam NCCT ningbaw Nai Han Ta hku nna shiga dap ni de tsun wa sai rai nga ai.

Raitim, asuya maga UPWC ningtau Ningbaw Munghpawm Hkringmang U Awng Min hte MPC Matsun Du U Hla Maung Shwe yan hte hkrum shaga ai shaloi gaw federal munghpawm hkrang hpe hkap la ai lam, Slg. Nai Han Ta hku nna chye lu ai.

Ndai lam hpe August 15 ya NCCT hte asuya UPWC lapran Yangung MPC rung e hpawng ai nhtoi hta shiga htawn ni hpe Salang Nai Han Ta sanglang dan ai rai nga ai.

Posted in: SHIGA