Myen hte KIA, Hpakan lam Sabaw Maw hta 2 lang gasat poi byin

KIA Dap 6 hpyenla ni, Hpakan

Myen asuya dap hte Wunpawng Mungdan Shanglawt Hpyendap (KIA) lapran, Jinghpaw mungdaw Myitkyina-Hpakan lam Sabaw Maw kaw 2 lang gasat poi byin wa sai re.

Asuya hpyen hpung ni gaw KIA Dap 6 ginra, manu dan ai sut nhprang lung hkyeng (snr Badi) pru ai Sabaw Maw de htu shang wa ai majaw August praw 8 hte 10 ya shani gap hkat lam byin wa ai re lam, ginra buga masha ni KNG Jinghpaw Shiga Dap de tsun ai.

Ndai Sabaw Maw gaw Myitkyina-Hpakan lam Kap Maw Zup mare a sinna maga deng 6 tsan ai kaw nga ai rai nna, lai wa sai shi ning jan kaw nna Badi htu sha nga ai re lam, buga masha ni hpe lakap let chye lu ai.

Gasat poi mabyin lahkawng hta uhpung lahkawng maga si hkala kade nga ai lam hkrak n chye lu ai re.

Raitim myi-chyaw-mu ni hku rai yang, hkala hkrum ai Myen hpyenla 2 hpe Myitkyina de htaw mat ai hpe August praw 9 bat Kru Ya shani mu nna, dai hte maren Laban Ya shana maga mung hkala hkrum ai hpyenla 4 hpe mawdaw hte htaw mat wa ai lam, chye lu ai..

Sabaw Maw, Loi Ne Bum kaw dap jung ai KIA Dap 6 npu Mungshawa Hpyen Hpung (MHH) dap hpe ya ten du hkra n yen ya ai raitim pa (Sabaw Maw mare) na shanhte a ginsum nkau hpe asuya dap ni wan nat kau ya sai lam, ginra buga masha ni tsun ai re.

Majan a majaw htinggaw 100 jan nga ai Sabaw Maw mare masha ni hte seng htu ai ni, ya ten ni nawn ai Nam Ya hte Kap Maw Zup mare lahkawng de hprawng yen nga ai lam hpe mung, dai ginra na Jinghpaw Wunpawng Hkalup Hpung Ginjaw (KBC) sara ni hku nna chye lu ai re.

Manghkang byin ai shara lahkawng de, Myen hpyendap gaw Danai, Mugawng hte Hpakan shara masum de na hpyen n-gun ni hpe mawdaw ni hte jat bang nga ai lam, myi-chyaw-mu ai ni KNG Jinghpaw Shiga Dap de tsun ai re.

Sabaw Maw kaw gasat poi byin ai aten laman sha, Mungnyang (Mu Nyin) ginwang Nawnglut ginra kaw mung asuya dap hte KIA dap 26 lapran yawm dik kalang aten kadun gap hkat wa sai lam KNG Jinghpaw Shiga Dap sagawn chye lu ai.

Ya ndai Nawnglut hte Sabaw Maw gasat poi ni hte seng nna Myen asuya shiga dap ni sha n ga KIO jum tek ai shiga dap ni hta mung, shiga tang madun ai lam n nga ai.

Manu dan ai ja, lungseng, pat hte lung hkyeng (Badi) nhprang sut rai maw ni nga ai KIA Dapba 2 ginra hta asuya dap hte gasat gala lam ni byin nga ai lam hpe Laiza ginjaw na KIO Dat Kasa Hpung ningbaw Sara Kaba Sumlut Gam KNG Shiga Dap de daini bat Lahkawng Ya shani tsun shateng wa ai.

Ya na zawn Dapba 2 ginra hta gasat poi byin nna hpyen masa shaja hkat nga ten, asuya hte KIO gaw shata mi kalang hkrum hkat ai, uhpung lahkawng dat kasa maren mara shanglawm ai ‘manghkang bawngban hparan komiti’ zuphpawng hpe daini Jinghpaw mungdaw mare daju Myitkyina kaw galaw nga ai re.

Posted in: SHIGA